TB vei 1087 hmuhchhuah zinga 68 kum 14 hnuailam

Kuminah Mizoram-a tB vei hmuhchhuah tawh 1087 atangin kum 14 hnuailam mi 68 an awm.
National Health Mission Mizoram mission director Dr R Lalchhuanawma kaihhruaiin Ningani khan State tB Forum Meeting neih a ni a. Heta report danin, kumin January atanga June inkar khan Mizoram-ah tB rinhlelh enfiah mi 61246 atangin tB kai hmuhchhuah 1087 an awm. Heng zinga 68 (6.5%) hi kum 14 hnuailam an ni a, kum 14 chunglam 977 (93.5%) an ni. tB kai hmuhchhuah zinga 600 (57%) chu mipa an ni a, hmeichhia 445 (43%) an ni.
tB damdawi lo ei ve tawh, ei tur zat ei tluantling loh avanga damdawi sang zawka enkawl ngai – MDR-tB mi 47 hmuhchhuah an ni a; tB kai hmuhchhuah thar zingah 520 (49%) chu chuap tB niin, chuap pawn lama tB vei 538 (51%) an awm. tB leh HIV kai kawp mi 92 hmuhchhuah an ni a; kuminah tB vanga thi 71 awm tawhin, tB kai hmuhchhuah atanga tih tawh zat chu zaa 86.49 a ni.
tB damlo chhawmdawlna programme – Pradhan Mantri tB Mukt Bharat Abhiyaan – Nikshay Mitra Initiative kalpui mek a ni tih sawi a ni a. Hemi atan hian minister, MLA leh sawrkar official-ten ‘Food Basket’ hmanga tB damlo tanpui mek 103 an nei a; tB damlo Food Basket dawng mek 374 an awm. tB natna kai inenkawl zinga zaa 28 vel chiahin donor an nei a, donor neih belh zel an duh tih pawh sawi a ni.
tB umbona atana campaign kal mek – tB Mukt Bharat 100 Days campaign-ah khua leh vengah screening runpui neih thin a ni a. Heta inentir tam ber chu kum 50 chunglam an ni. tB vei hi kum 15 leh 45 inkarah an tam ber avangin, screening neiha kum valai zawk an kal tha lo thin chu harsatna lian tak a ni tih sawi a ni a. College zirlai, office-a thawk kum valai, kum 15 – 45 inkar hrim hrim chu a tam thei ang ber screen an nih theihnan hma lak a ngai tih sawi a ni.
tB damlo hospital admit mahmawh tan sawrkar hospital-ah ICU khum khat leh general ward khum 5 hauhsak an nih theihnan hma lak nise an ti a.
tB damlo chaw tha hmanga chhawmdawltu donor zawn kawngah hmalakna tur hrang hrang sawiho ani bawk.