ILP nei lo lut awm nia lang ngaimawh

Sub Hqrs YMA Saitual chuan kumina NE Khawdungseia YMA inkhawmpui rorel bawhzuiin tunhnai khan an huamchhunga YMA Branch hrang hrangah inner line permit (ILP) endik runpui an kalpui a, ILP nung tawh lo mi 20 an hmuchhuak.
Sub Hqrs YMA Saitual hian Saitual huamchhunga hnamdang hnathawk leh sumdawng 66 ILP an enfiah a, chu’ng zingah chuan ILP nung tawh lo 20 hmuchhuakin, sponsor-tute nen an inbiak hnuah an zinga 4 chu an ram lamah hawtir niin, midang 16 chu hun tiam chhunga an ILP tifel tura hriattir an ni.
Sub Hqrs YMA hruaitute chuan, ILP fel lo chunga Mizorama hnam dang hnathawk awm leh thin leh Sairang Rel Station atanga lo lut zingah ILP nei lo tam tak an awm nia lang chu an ngaimawh tih sawiin, thuneituten tun aiin enzui uluk se an duh tih an sawi. Hei bakah hian, hnathawk tura hnamdang sponsor-tute pawh, an sponsor-te chu an permit neihna hmunah chauh hna thawk tura hrilh tur leh hmun danga an kal darh lohnan enzui thin turin an chah bawk.