India-in Karachi beihnaa tel anga Pakistan-in a puhna pha

ndia chuan Pakistan-in tun hnaia Karachi-a firfiakte chetna thlengah inhnamhnawih ve anga a puhna chu a hnawl a, thu bul nei lo nia sawiin Islamabad chu a rama firfiakte laka hma la turin a ngen let.
Pakistan-in puhna chhangin Pathianni khan external affairs ministry thupuangtu, Randhir Jaiswal-a chuan Karachi thil thlenga puhna hi India chuan ‘a hnawl fithla’ tih a sawi.
“Mi dangte kawh aiin Pakistan hian an ram chhung hawia firfiakte hmunhma leh thil awmte laka rintlaka hma la zawk rawh se,” tiin Jaiswal-a chuan a sawi.
India leh Pakistan inhnialna hi Inrinni zana Karachi-a Pakistan Rangers (Sindh) compound beih chungchang a ni.
Pakistani sipaite sawi danin khawpui chhunga Gulistan-e-Jauhar–a Rangers hmun chu ralthuam kengten an bei a, hel pathum leh paramilitary pathum an thi.
Beihna hi sipai media wing, Inter-Services Public Relations (ISPR) chuan an awm phalsak loh, Tehreek-e-Taliban Pakistan (TTP) pawl atanga peng, Jamaat-ul-Ahrar tih niin an sawi.
Pawikhawihtute hian zan dar 8:30 velah Sindh Rangers Bhittai wing gate chu lirthei hmanga su chhiain compound chhung an luh hmain grenade an vawm a, a puak nasa hle nia sawi a ni.
Venhim hna thawktute chuan beitu pathum an that a, rinhlelh dang pakhat hliam tuar chungin an man bawk a. An man hi Afghan a nih thu an sawi.
He thil thlen hnu hian Pakistani sipaite chuan Jamaat-ul-Ahrar chu Indian-te puih leh thawhpui niin a sawi a, finfiahna erawh an sawi lo.
Pakistani Prime Minister Shehbaz Sharif-a pawhin Karachi hi tlawhin India chuan Pakistan-a remna leh muanna tichhe turin ‘a thawhpuite’ a hmang niin a puh bawk a, ani pawhin finfiahna a sawi lo.
A hma pawhin India hian Pakistan-in hetiang lam hawia a puh thin chu a lo hnawl tawh thin.
Pawikhawihna hi October, 2024 hnua Karachi-a firfiakte chetna lian ber a ni a, khawpui tumhmun bula thihchilha bomb tihpuahah Chinese engineer pahnih an thi a, Balochistan Liberation Army chuan an tihah an chhal.
Sipaite chuan Rangers awmna beihnaa inhnamhnawih firfiak an la awm an awm leh awm loh an dap zui nghal a. TTP-a Jamaat-ul-Ahrar hi Pakistan hmarthlang lama Khyber Pakhtunkhwa province-ah an tam a, civil mi, venhim hna thawktu leh sorkar mi pawimawhte an bei nasa thin.
Pakistan leh Afghanistan inlaichinna a la chhe zel bawk a, Islamabad chuan Kabul-a Taliban sorkar chu an ram atanga TTP-te chet phalsakah a puh thin a, Afghan thuneitute chuan a dik loh thu an sawi thin.
Pakistani sipaite chuan Afghanistan-a TTP inthup leh training hmun nia an sawite chu an beih tawh bawk.