Ruah sur nasain a thlen chhiatna vangin Assam leh AP buai

Ruah sur nasa vanga tui lianin hmarchhaka Assam leh Arunachal Pradesh-ah chhiatna a thlen mek a, in leh kawngpui a tichhia a, lei min a thlen bakah Assam-a Dhemaji district-a kum 1965-a siam rel kawng lei pawimawh tak a chim bawk.
Thawhtanni khan Union Home Minister Amit Shah-a’n Assam Chief Minister Himanta Biswa Sarma chu phone-a biain sabereka khuangkaih thleng hmasa chungchang a sawipui a. Assam leh an thenawma Arunachal Pradesh-ah ni tam tak ruah a sur avangin district paruk huam chhungah mi 22,000 chuangin harsatna an tawk mek a ni.
Assam State Disaster Management Authority (ASDMA)-in a chhinchhiah dan chuan Dhemaji, Nalbari, Dibrugarh, Chirang, Lakhimpur leh Kokrajhar district-a tui lian chu mi 22,124-in an tuar mek.
Dhemaji chu a tuar nasa ber a ni a, mi 15,483 an buai phah mek a. Thuneitu chuan tui lian hian khaw 96 a chim a, lo hectare 1,690 vel a tihchhiat thu an sawi bawk.
Ruah sur chhunzawm rengin Brahmaputra lui leh a pengte chim chin a tisang a. Mihringah nghawng a neih bakah hian ransa 48,199 a nghawng tawh bawk.
Dhemaji district-a rel kawnga lei thenkhat a chim a, hei vang hian Archipathar leh Simen Chapari station inkara rel service chu tiam chin awm lova tihtawp rih a ngaih phah.
Northeast Frontier Railway (NFR) chuan thuchhuah siamin, “He kawngpui hi kum 1965-a siam a ni a, a broad gauge-a tihlen a ni a, a dinhmun pawh a thain a him hle thin a; mahse, ruah sur nasa tak karah a hnuaia lui kam hmun zau takah tui a luang darh a, a ban (pier) pakhat chu a nghet lo hle a ni,” an ti.
Rel chhiat phah a awm loh thu leh hliam tuar an awm loh thu an sawi a. Hmun thenkhat, rel tlan tam lohna kawngah tui chim chin sang zel vangin rel tlan tihtawp rih a nih thu an sawi bawk.
Arunachal Pradesh-a ruah bawhawk sur avanga tui lian leh lei min a thlen hnuah state pumah Nilaini thleng hian ruah tam tak a la sur chhunzawm dawn nia sawi a ni.
Thuneitute chuan tuna khaw awm dan hian lei min tam zawk leh tui lian nasa tak a thlen thei a, hmun derthawnga awmte ni tin khawsak a tibuai thei niin an sawi.
Arunachal Pradesh-a ruah sur vanga tui lian vangin tun thlengin mi pathum an thi tawh a, chin hriat lohte zawn leh chhanchhuah hna thawh mek a la ni tih thuneituten an sawi.
Arunachal Pradesh-a ruah sur nasa avang hian Leku lui chu a chim a sang hle tawh a. Tual chhung mite chuan hetianga zau taka khaw hrang hranga a luan an hriat vawi khatna a nih thu an sawi a. Tui lian hian khaw eng emaw zat a chim a, an thenawma Assam-a Jonai subdivision-a Kedichuk pawh a chim a ni.