Vitamin D overdose

Vitamin D hi ruh hrisel nan leh taksain natna a do theihna (immune system) tihchak nan a pawimawh, kan taksain calcium tangkai taka a lo hip zung zung theih nana pawimawh tak a ni. Mahse, tun naiah Vitamin D supplement hralh a tam deuh thut mai a, hei vang hian vitamin D overdose (hypervitaminosis D) risk a hlauhthawmawm riau a ni, damdawi lam thiam ten min chawh a nih loh chuan mahni thu a vitamin D supplement lo ei ve ngawt hi a him lo a ni.
Vitamin D overdose hian thisena calcium tam lutuk, hypercalcaemia a thlen thei a, chu chuan kal (kidney) tan hnathawh tur a titam ta hle mai a, timur-ah calcium inchhekkhawl, nephrocalcinosis a thlen thei a ni. A lo rei deuh phei chuan kalin thil a thlitfimna a tichhia a, kal a tihliam a, siamthat theih tawh loh kidney failure te pawh a thlen thei.
Chuvangin, a rawn lanchhuah hmasak dan hi kan hriat a pawimawh a, a warning sign hmasaah chuan luakchhuak, tui hal reh hlei thei lo leh zun in ang deuha zun chhuak deuh sek te hi a ni a, heng hian electrolyte imbalance a entir a, kal hnathawh lamah thil fuh tawk lo a awm tih a entir thei bawk.
Vitamin D kan taksa a a tam lutuk chuan kal-in calcium thlitfim tur a ngah phah hle a, chu chuan kal tissue-ah calcium inchhek khawm a awmtir a, zawi zawin kala lungte awm (kidney stone) emaw nghet taka calcium inchhek khawm a lo insiam a, chu chu nephrocalcinosis an ti. A lo rei deuh hnuah phei chuan kal a rim lutuk avangin kalin thil a thlitfimnain a tuar ta thin a, chu chuan kal a tihliam a nih loh pawhin, vanduai deuh phei chuan kal chhiat hlenna (irreversible kidney failure) te pawh a thlen thei.
Journal of Renal Injury Prevention-a zirchianna pakhat an tarlanah phei chuan vitamin D intoxication (overdose) hian kal hliam nasa tak (acute or chronic renal injury) a thlen thei a, hei hi mahni thua vitamin D supplement lo ei ve ngawt vang mai piah lamah damdawi inchawh fuh loh palh (prescribing error) avang te pawhin a awm thei.
A lanchhuah dan hi thildang nen pawha ngaihpawlh theih tur tam tak awm a ni a, luakchhuak leh luak te pawh thildang vanga awm emaw tihpalh theih tur a tam hle a, chuvangin vitamin D overdose hi hriatchhuah meuh chuan a lo tlai emaw a lo nasa hman tawh viau thin a ni. Chronic hypercalcemia chuan kal mai ni loin, taksa peng hrang hrang pawh a nghawng pawi thei a, lung lam (cardiovascular) harsatna te pawh a thlen thei a ni.
Vitamin D overdose lan chhuah dan tlanglawn deuh te chu:
1. Luak chhuak leh luak.
2. Tuihal reh hleithei lo.
3. Tihrawl chak lo leh chau/zawi.
4. Ngaihtuahna sawrbing hleihtheih loh, thil hriat/ chhinchhiah hleihtheih loh leh haihawt lutuk.
5. Kawng bawr (lower back) leh a sir lam (side) na leh kham.
6. Ke vûng leh thâwk lama harsatna.
Vitamin D chu engzat nge kan mamawh?
National Institutes of Health chuan dan naranin puitling ten nitin vitamin D kan mamawh hi a tam lo hle a, 400-1,000 international units (IU) a ni a, 4,000 IU chunglam regular deuh taka lak luh reng chu a hlauhawm chin a ni tawh a, thla khat emaw kum khat emaw chhunga 8,000-12,000 IU te phei chu dose sang lutuk a ni tawh.
Vitamin D capsule hi doctor ten min chawh pawhin kar khata vawi khat ei a ni tlangpui a, hei hi hriatsual palh avanga nitin lo ei te pawh awm thei a ni a, hei hian overdose hi a thlen thei.
Engtin nge vitamin D overdose tur kan inven ang?
Vitamin D overdose hi doctor te enpuina ni lo a mahni tawka vitamin D supplement kan lo ei ve ngawt te hian a awm duh hle a, hei bakah hian vitamin D tamna thil chi hrang hrang a ruala kan ei deuh teuh teuh reng te leh mithiam te enpuina ni lo a high-dose injection avang te pawhin overdose a awm duh hle. Harsatna kan tawh loh nan damdawi lam thiam ten min chawh a nih ngawt loh chuan mahni thuin vitamin D ei ve ngawt loh tur a ni a, doctor ten min chawh pawhin a ei dan tur an tih ang thlapin, a dose ang chiah ei tur a ni. Vitamin D supplement rei deuh hlek ei kan ngai a nih pawhin a khat tawkin thisen test-in, vitamin D leh calcium level check thin tur a ni.
Vitamin D hi hriselna atan a pawimawh a pawimawh hle a, mahse, kan taksa mamawh tawk aia tam chu a tha leh chuang lo tih hriat tur a ni. Vitamin D kan hmuh theihna tha tak chu Ni êng a ni a, kar khatah vawi li vel minute 15-30 vel tal ni lum-ah inpho thei ila, taksa khuhbo vek lovin, ke, ban leh hmai vel ni êng dawng theiin awm se a tha tawk viau a ni. Chhun (midday) ni sa hi vitamin D dawn nan a tha ber a ni bawk.
Hetihrual hian vung rawng hâng deuh tan chuan a ngai rei ve leh deuh thung a, vun rawng hâng deuhah chuan vunin ni zung atanga vitamin D siam nan a duh rei bik thin. Hei bakah hian sunscreen pawh hman loh a tha ber a, sunscreen 8 SPF chin hian ni zung atanga vitamin D siamtu lo block theih chin a nei a, SPF 30 chin phei chuan 95-98% a lo block thei.
Ni zung hi vitamin D kan hmuh theihna tih avangin rei tak tak inhem a tul leh kher chuang lo a, kar khatah vawi li vel, tum khatah minute 15-30 vel, kekawrbul leh kawr banbul ha chunga chhuna nilum ai kha a tha tawk viau a, sunscreen hmang lo a ni sa hnuaiah awm rei chuan kan sunburn leh hlauh si ang!