Asia khawthlanga sumdawnna zalenna hum a tul – India

India chuan Asia khawthlanga remna leh muanna a awm theihna tura hmalak chhunzawm zel a tul thu leh lawng leh sumdawnna zalen taka a kal theihna humhalh a tul thu a sawi.
Thawhlehni khan Prime Minister Narendra Modi-a leh Iranian President Masoud Pezeshkian-a phone-a inbiain hemi chungchang hi an sawi dun.
Hruaitu pahnihte hian US leh Iran inkahhai karah an inbei tawn leh chu tha an tih an tih loh thu phone-ah hian an sawi a. An inbiakna hi Pezeshkian-a’n tun kar atanga tan tur, an Supreme Leader hlui, Ali Khamenei-a vuinaa Modi-a tel tura a sawm hnuah a ni bawk.
Modi-a chuan social media-ah, “Inbiakna kawnga hmasawnna awm chu a lawmawm a, hmalakna chhunzawm zel chuan he biala remna nghet a thlen theih a beiseiawm a, Hormuz Strait-ah hian India leh khawvel tan zalen taka lawng kal a pawimawh hle tih sawi nawn leh a ni,” a ti.
Phone-a inbiakna chungchanga Indian sorkar thuchhuahah Modi-a hian ‘he biala remna leh muanna nghet tak awm theihna tura hmalak chhunzawm zel a tul thu a sawi nawn leh a, zalenna leh sumdawnna zalenna humhalh a tul thu a sawi bawk’ tih an tar lang.
Prime minister chuan Iran leh US ten inhrethiam tawna an inbengdai chu lawmawm a tih thu sawiin, “India chuan thil hrang hrang hi inbiakna leh diplomacy hmanga chin fel a ngai tih a sawi nawn leh a ni,” a ti.
India chuan tun hnai thla eng emaw zat chhung khan Strait of Hormuz khar a nih hnuah tuialhthei, boruakalhthei leh leitha a tlakchham hman hle a, tun hnaia tuialhthei a lak luh 50% vel phurhna tui kawng pawimawh Tehran-in a hawng leh ta chuan a tiziaawm leh tan tawh a ni.
Phone-a an inbiaknaah hian Pezeshkian-a chuan Modi-a chu tun hnaia Asia khawthlanga thil thlengte leh ‘hma lam pana an kal dan’ a hrilh tih sorkar thuchhuah chuan a tar lang a, a chipchiar erawh a sawi lo.
Iranian Supreme Leader thi tawh vuinaa an telna level chungchangah India hian engmah puan a la neih loh laiin thil hriate chuan Minister of State for External Affairs Pabitra Margherita leh Bihar Governor Lt Gen (retired) Syed Ata Hasnain te chu he hunah hian India aiawha tel tura beisei an nih thu an sawi.
Kar hmasa khan Pezeshkian-a hian Modi-a hi vuinaa tel turin a sawm a, Iranian khawpui pathumah ni ruk chhung awha hun hman tur a ni a. Tuna Shia member tlem te zinga danpui hnuaia chanvo sang chelh mek zinga mi, Margherita leh Hasnain te chu July 4-a Tehran-a hman tur vuinaah an tel dawn nia sawi a ni.
Kum 86 mi, Khamenei-a hi February 28 khan a thi a, hei hi Israel leh US tang dunin Iran an beih tan ni, Asia khawthlanga buaina a chhuak tan ni a ni a. Tehran-a a pisa awmna compound chu thlawhna hmanga kapin a thi a ni.
Khamenei-a thihna thlentu Israel leh US sipaite chetna chungchangah India hian sawi a nei lo va, March 5-a Foreign Secretary Vikram Misri-a’n Iranian embassy a tlawh khan sorkar aiawhin sunna lehkhabuah a hming a ziak lut thung.