Zebra crossing+Overbridge

K. Hmingthankaia

June thla vela Aizawla motor kawngpui kea kanna lai tur Zebra crossing ngaihpawimawh a tul thu Police lamin an rawn tih chhuah leh tak azarah, mipui pawhin kan sawi tui chhunzawm hlawm hle mai a, a tha hle a ni. Zebra crossing-te chu thil nihphung pangngai reng kha ni mah se la, thil tih dan tur tha hi chu inhrilh nawn fova, inzirtir nawn fo hi a tul tlat reng a ni. Kan police-te thahnemngaihna azarah tunah chuan mipui tan pawh kawngpui kan a nuam ta deuh sawt e.
Chutih lai chuan, Aizawl kawngpui pengthuam lai kal kanna tura siam Overbridge hi mipui hian kan la hmang tangkai tawk lovin, overbridge-a kal kan la hreh em em mai leh, zahthlak ang deuh roha kan la neih tlat mai hi chu a tha lo khawp mai.
Overbridge kan neihna hi a rei ve fu tawh a, kei pawhin overbridge-a kal uar tura infuihna hi kum 10 vel kalta atang khan a khat tawkin ka lo ziak ve tawh thin a ni. Mahse, vawiin thlengin kan la kal tha duh meuh lo zawng a la nih hi.
Overbridge awm reng chung si a, rem leh rem lo, hlau chung chung leh motor tlan tluang lai, traffic flow tibuai zawng kher ni bawk leh police tibuai zawng khera kawng kan kan la tum tlat kher thin hi chu mak ka lo ti ve deuh thin a ni. Zebra crossing a ni emaw, ni lo emaw, motor tlanna laia kawng kan kan hian thil pawi eng eng emaw a thleng thei tih te hi hriat a tha. Motor tlan tluang lai rei lo te kan tih khaihlak pawh khan khawpuiah chuan thui tak a nghawg buai thei thin a ni. Tin, kawnga kan kal lai tak khan lirthei chiangkuanglo emaw, a khalhtu chiangkuanglo emaw pawh kha an lo tlan thut thei tho bawk a ni.
Ka lo sawi tawh thin angin kei pawh hi nghawng ruh, cervic spine chhe tawh, hmun hmawr leh hmun sanga kal hrehawm ti tak, luhai thin ka ni chung pawh hian, a theihna lai laiah chuan overbridge sir hungna vuan chung hian ka kal hram hram thin a. Kawngpui thawl hle ni te a nih ngawt loh chuan Bazar Bungkawn amiah phei hi chuan ka kal ziah thin a ni. Overbridge awm reng chunga motor kalna lai khera kawng kan tum thinte hi ka en zui ru deuh fo thin a, overbridge chhuahna lam, ka kalna tur lam thova kal turte hi an lo ni ve leh tho thin si a, mak ka ti thin mai pawh ni lovin, ka ngei deuh zawk hial thin a ni.
Overbridge-a kal kan hreh tlat leh kal kan zah tlat chhan hi changkanna ni lovin, kan at vang mai mai a ni a. Overbridge-a kal kan zah avang khan chhiatna enge maw lo tawk ta ila a pawi dawn lutuk asin. Chutiang chhiatna chu khawimaw laiah a lo thleng tawh reng em? La thleng lo pawh ni se, tun tumah hian ka chungah a thleng thei reng asin, eng anga nasa nge thleng dawn tih tunge sawi thei? Chubakah, thlamuang taka kal theih reng laia rem leh rem lo, hlau chung chung leh inthlahrung tak chunga kawng kan kher kha enge a tulna? Chutah lirthei tlan tluang lai leh police tibuai zawng kher la ni lehnghal, atthlak tak a ni.
Chuvangin, lirthei leh mihring kan him tlan theihna tura siam overbridge awmna apiangah hi chuan, hreh lo leh zak lovin i kal dial dial tawh ang u aw. Kan kal tumna chu overbridge chhuahna nen chuan lo inhawi lo deuh hret pawh ni se, kan that tlanna turah te hi chuan tlema let leh hret te pawh hi i hreh lo thin ang u. Lirthei tlanna laia kawng kan tawk chu lo awm ve reng tho mah se, a then, engemawzah tal hi chuan kan khawpui chetvel dan te, lirthei tlan lai leh police leh midang tibuai belhchchhahtu nih ve zel kher hi i tum lo ang u hmiang.
Tuna Zebra crossing bula zebra crossing ngaihpawimawh a tul thu kan police lamin an tar hma daih tawh khan, overbridge bulah hian overbridge-a kal hram hram tura inzirtirna emaw, ngenna emaw hi ka rilruin tar tha ka lo ti tawh thin a. Police lam hian an tar lo a nih pawhin, Bazar Bungkawn ami-ah tal hi chuan Traffic SP hnenah keimahin tar ka dil dawn emaw ni chu aw, te ka lo ti deuh tawh thin a ni. Mahse, hei, zebra crossing pawimawhna pawh an rawn tar ta tho bawk a, overbridge ngai pawimawh tura tihna te pawh hi han tar leh law law se ka ti hle mai. Tin, overbridge bula lo awm police te leh midang tu pawh hian, mite hi overbribge-a kal hram hram tura infuih hi i ching ang u. Kei pawhin inthlahrung tak chungin ka fuih ve zeuh zeuh thin a ni. Tichuan, tuna zebra crossing kan rikpui hluai ang tho hian overbridge pawh hi i rikpui hluai ve teh ang u.
Aw le, thil pakhat, tun ZPM sawrkar tirh lai vel khan, Aizawl khawpui kawngpui tlangdung, Kulikawn leh Bawngkawn inkara hmun pawimawh deuh deuh leh tul hle nia ka hriatna lai point hrang hranga mipui kawng kanna tur, overbridge siam dan tur, keima thiam tawka ka rawt vena chu, tun, an term hmasa ber an hman zawh hma ngeia siam tura ngenna ngenngawl angreng ve deuh tak te kha ka lo siam ve tawh kha a ni a. Chu chu kumkhuaa ZPM ministry hriatrengna tur a nih thute, nakina siam ngei ngei la ngai tur tho a nih thu leh, nakina mihring leh lirthei tam lehzual hnu, khawpuia chetvel buaithlak hnu leh, a siamna lai tur vel hmunhma pawh a chep lutuk hnua siam ai chuan, tuna tlema a la ziaawm deuh laia siam hram tur te khan ka’n lo ti ve sasawi khanglang ta kha a ni a. A siam dan tur thenkhat, Bawngkawn pengthuam chhim lam leh hmar lam inkar chauh tal saw chu motor kawng chhawng siam a theih loh pawhin, kea kalna tur tal chu kawng chhawng, overbridge siam tih te, Treasury square pengthuam chhak leh thlang inzawm veka siam tihte, overbridge design mawi taka siam chu khawpui timawitu a nih tur thute, kal nan ringawt ni lo, chawlh hahdam nante, mei zuk nan leh phone hman nantea mi tam takin an hman tur thute phei chu tunah chuan sawi tawh lo mai ila.
Mahse, hei, an term chu kum thum an lo hmang ral dawn hnai tawh a, overbridge lam chu an ngaihtuah hman ta lo pawh a ni ang e. A thawm riva pawh kan hre lo em mai. Kei lahin a tu-a-te mah pawh chu zawt ta nge lah chu ka ti chuang bik hlei lova. Tunlai, he thu ka ziah lai tak phei hi chuan chutiang infrastructure lampang pawh an ngaihtuah hman pawhin ka hre lo e.
Mahse, tun an hun tha neih lai, an term hmasa ber chhunga siam zai an rel lo te a nih vaih erawh chuan, inthlan leh dawn hunah te hian Pathian zarah damtea kan la nung ve tek tek te a la nih ve ngai chuan, anmahni vawmna tur chu ka nei tha khawp ang le.