Mi ngaih aiin Ukraine-Russia indo tawpna a hnai – Trump

US President Donald Trump-a chuan Ukraine-a kum li chuang indona awm tawh tawpna tur chu ‘miten an hriat aiin a hnai zel’ tih sawiin, tun kara Turkey-a NATO summit-ah Ukraine chungchang a sawi dawn tih a sawi.
Trump-a hian kar tawp khan Russian President Vladimir Putin-a leh Ukrainian President Volodymyr Zelenskiy te a biak hnuah Thawhtanni khan he thu hi a sawi a. Buaina chin fel dan tur a awm tih chiang takin a sawi lo va, hetih lai hian Russia-in Pathianni zan zankhuaa Kyiv leh a chhehvel a kahnaah mi 28 vel an thi.
Moscow-ah chuan Kremlin thupuangtu, Dmitry Peskov-a chuan buaina chin fel dan tura US tanna chu a danglam lo niin a ngai tih a sawi.
Hetih lai hian Financial Times-in a kawmnaah Zelenskiy-a chuan US president hian tun hnaia Ukraine hlawhtlinnate thlirin buaina hi a thlir dan thar a neih a rin thu a sawi ve thung.
Oval Office-a thuthar thehdarhtute a kawmnaah Trump-a chuan, “Miten an hriat aiin kan hnaih tawh niin ka hria a. President Putin-a pawhin tihtawp a duh a ni,” a ti.
Trump-a hian July 4 chawlhah Putin-a nen ‘tha takin’ an inbia tih a sawi a, Kremlin thawhpui pakhat chuan minute 85 chhung an inbia tih a sawi bawk.
Trump-a hian Nilaini hian Ankara-a NATO summit-ah Zelenskiy-a hi a hmu dawn a, US thuneitu pakhat chuan indona tihtawp tura na zawka nawrna atana indawrna a nih tur thu a sawi.
Zelenskiy-a a biak hnuah Putin-a a biak zui a nih a rin thu a sawi bawk.
Peskov-a chuan Putin-a leh Trump-a te hian inbiak zui zel an remti tih sawiin Moscow chuan US president hian buaina chungchangah tanhmun nghet tak a neih a rin thu a sawi.
Zelenskiy-a pawhin kar tawpa Trump-a nen phone-a an inbiakna thu a sawi ve bawk a. Financial Times hnenah US president hian Russian tuialhthei hmunte an beih avangin ‘ti tha’ a ti tih a hrilh niin a sawi bawk.
Russia hian February, 2022 atang khan a thenawm, Ukraine hi a rûn a, heta tang hian inkahhai awm zeuh zeuh mah se indona a kal zel a. Trump-a hian president nih tuma a campaign lai khan tihtawp a tiam a, indawrna leh inbiakna pawh vawi tam tak huaihawt tawh mah se tun thlengin hlawhtlinna tak a la awm lo thung