Manipur-a AR lambuntute zawng zui zel

Thawhtannia Manipur-a Ukhrul district, Nungshangkhong (Lungshang Khong)-a Assam Rifles sipai pahnih lambuna thah an nih hnuah venhim hna thawktuten a titute zawn hna an thawk zui zel a, man erawh an la nei lo.
Assam Rifles mi pahnih – warrant officer Balwant Singh leh Rifleman CM Singh (40 Assam Rifles Shangshak battalion-a driver)- te hi Thawhtanni chawhnu dar 1.30 vel khan Ukhrul police station huam chhunga awm, district khawpui atanga km 16 vela hla, Nungshangohong khuaah an thi a ni.
Thuneitute chuan Ukhrul district headquarters atanga ration thil an lakkhawm hnuah, 40 Assam Rifles, Shangshak-a kir lehna tur convoy chu a beituten kawngpui sira improvised explosive device (IED) pathum an dah an pelh rualin pahnih a puak a, kil tin atangin silaia kah zui an ni bawk tih an sawi.
Manipur police chuan an ruang hi Jawaharlal Nehru Institute of Medical Science (JNIMS), Imphal damdawi inah dah a ni a, Thawhlehni khan postmortem a ni tih an sawi.
Eng pawl mahin an tihah an la chhal lo.
Manipur-a buaina hi Meitei leh Kuki inkarah chhuak hmasa berin tunah erawh hnam hrang hrang an tel tawh a. State chhunga Meitei leh Kuki-Zo hnam hian May, 2023-a an inkara buaina a chhuah hnuah an chenna hmun lai ve ve chu an khar ve ve a, tun thlengin mi 260 vel thi awm tawhin mi 60,000 chuang baihvaiin an awm phah mek a ni.