DM&R minister-in leiminna tlawh A tul chuan amah hrilh turin chah

Disaster Management & Rehabilitation minister Prof. Lalnilawma chuan Ningani chawhnu khan Ngaizel petrol pump bula lung tlakna hmun a enfiah.
Minister chuan leimin avanga buaina tawk an awm chu pawi a tih thu a sawi a. Report dawn danin, zan hmasa thleng khan khaw cheng avanga chiatna thleng hi Zoram hmun hrang hrang, hmun 29 velah a awm tih a sawi. Sawrkar chu chhiatrupna thleng avanga harsatna hrang hrang awm thei sukiang turin a inpeih reng tih sawiin, chiai lo tur leh fimkhur turin mipui a chah.
Minister chuan district tinah chhiatrupna thleng thei lakah inven leh hmalak dan tur ngaihtuah mek zel a ni tih a sawi a. State Disaster Management Authority leh District Disaster Management Authority-in theihtawp an chhuah zel tih sawiin, hmun hrang hranga BDO leh zonal officer-te pawh a rang thei ang bera che chhuak thei tura hrilhhriat an ni tih a sawi bawk.
Chhiatrupna avanga sawrkar atanga tanpuina dawn theih awm ang pawh felfai tak leh dan behchhana pek an inhuam reng tih a sawi a ni.
Chhiatrupna thleng thei hrang hrang laka inring reng turin mipui a chah tih Prof. Lalnilawma hian a sawi a. Chhiatna a thlenin chiai mai loa, sawrkar hrilhhre thuai tura chahin, State Emergency Operation Center leh District Emergency Operation Center chu eng hunah pawh biakpawh theih reng a ni tih a sawi a. A tul a nih amah pawh phone hmanga hrilhre mai turin a inhuam reng tih a sawi a ni.