Hotel /homestay neitute bawlhhawlh sawngbawl dan thar hman tur sawipui

Aizawl Municipal Corporation chuan AMC area-a hotel leh homestay neitute pualin bawlhhlawh sawngbawlna dan thar Solid Waste Management Rules 2026 leh waste generators mawhphurhna hrilhfiahin Ningani khan an kokhawm a. Hotel leh homestay neitu mi 152 an tel.
Aizawl mayor H Lalremtluanga chuan, Solid Waste Management Rules 2026 hi Ministry of Environment, Forest & Climate Change in Environment (Protection) Act 1986 behchhana a duan, India ram pumah kumin April 1 atanga hman tan a ni a, mipui thawhhona zarah hlawhtling taka kalpui a nih ngei a beisei a, thawhho puiah AMC huamchhunga hotel leh homestay neitute a sawm tih a sawi a ni.
AMC executive corporator (i/c Solid Waste Management) K Lalrodinga pawhin, hotel leh homestay siamtute avangin mi tam takin eizawnna an nei thei chu lawmawm a tih thu a sawi.
AMC town planner C Lalmuanawma, AMC assistant architect Veronica Vanlalhriatpuii Colney leh Aizawl Smart City Ltd. assistant engineer Kennedy Vanlalnunmawia ten SWM Rules 2026 sawi anga bawlhhlawh thliar hran dan tur, sawngbawl dan leh waste generators mawhphurhna hrang hrang an sawi a. Bawlhhlawh ngah zual (bulk waste generator) te chungchang, chi 4-a bawlhhlawh thliar hran tur thu, a khawnkhawm dan leh pawimawh dang sawi a ni bawk.
Hemi hnu hian hotel leh homestay neitute nen sawiho zui a ni a. Bulk waste generator-te hian dan tharin a phut angin, an bawlhhlawh an sawngbawl a tul tawh dawn a. He dan thar ang hian bawlhhlawh thliarhrang tha lo, a hmun loa bawlhhlawh paihte chungah na zawkin hremna pek theih a ni dawn a, zawm tha lo leh thuawih lo chu man theih an ni tawh dawn tih sawi a ni.