‘Fully literate state’ 6-na Uttarakhand

Uttarakhand chu National Education Policy (NEP) 2020 leh ULLAS (Understanding Lifelong Learning for All in Society) programme hnuaiah ram chhunga ‘fully literate state’ 6-na a ni ta niin thuneituten an sawi.
State chuan union education ministry hnuaia school education & literacy department-in puitling ziak leh chhiar thiamna tehfung a siamte a tlin hnuah Nilaini khan tihlawhtling niin an sawi.
Hemi hnu hian Uttarakhand Governor Lieutenant General (Retd.) Gurmeet Singh-a chuan an state chu fully literate puan tura rawtna chu a pawm a ni.
Uttarakhand hma khan state dang panga — Mizoram, Goa, Tripura, Himachal Pradesh leh Sikkim te chuan full literacy status an lo nei tawh.
Chief Minister Pushkar Singh Dhami-a chuan an hlawhtlinna hi state tana thil pawimawh tak niin a sawi a. He thil ropui tak tihhlawhtlinna kawngah hian mipuite active taka an telna bakah sorkar hmalakna nghet tak chuan hmun pawimawh tak a chang tih a sawi bawk.
State mipuite lawmpuina thu sawiin Dhami-a chuan, “Hetiang thawhhonaa hmalakna hian kum 2047-ah ‘Viksit Bharat’ (Developed India) thil tum tihhlawhtlinna kawngah a pui dawn a. Sorkar chuan digital literacy, financial literacy, zirna chhunzawm zel leh nun dan thiam te chu mi tinte hnena a thlen theih nan inpekna famkim nen a thawk chhunzawm zel dawn a ni,” a ti.
State cabinet chuan June 19 khan Uttarakhand chu fully literate puan tura rawtna chu a lo pawm tawh a ni.
Thuneitute sawi danin tunah hian Uttarakhand-a ziak leh chhiar thiam zat chu 98% chuang a ni.