Nagaland-a IED nia rin puakah AR pakhat thi

Nagaland-a Chümoukedima district-ah improvised explosive device (IED) nia hriat puakah Assam Rifles sipai pakhat a thi a, paliin hliam an tuar bawk tih thuneituten an sawi.
PRO Defence Nagaland chuan puak hi Thawhtanni chawhnu dar 2.30 velah, Assam Rifles Training Center (ARTC), Shokhuvi luhna pui ber atanga metre 500 vela hlaah a ni tih a sawi.
Hliam tuarte hi Christian Institute of Health Sciences & Research, Dimapur-ah dah an ni.
Director General of Police, Nagaland Rupin Sharma chuan an hriat theih chinah IED nia rin hi kawngpui sira autorickshaw-ah kam a ni tih a sawi.
State police leh venhim hna thawktu dangte chuan a chhehvelah mi zawn leh chhui zui hna an thawk nghal.
Chief Minister Neiphiu Rio-a chuan he thil thleng hi a dem thu a sawi a. “Chümoukedima-a thil tihpuahna hi dawihzep taka chetna, kan khawtlangah hmun chang lo a ni a. A tuartute ka ngaihtuahin ka tawngtaipui a. A mawhphurtute hre chhuakin dikna hlen chhuah a ni ang a. Hetiang chetna hian kan mite muanna leh himna a tihderthawn kan phal lo,” tiin X-ah a tar lang.
Tun tum thil thleng hi hmarchhaka chawlhkar khat chhunga Assam Rifles beihna a thlen vawi hnihna a ni a. Kar kal ta Thawhtanni khan Manipur-a Ukhrul district-a tute nge an nih hriat lohten an lambunnaah Assam Rifles sipai pahnih an lo thi tawh a ni.