A zan ruk nan US-in Iran kap leh, Iran pawhin a chhang
US chuan a zawna zan ruk nan Iran a kap leh tih an sipaiten an sawi a, ram pahnihte hi Strait of Hormuz thununtu zawk nih inchuhin an inbei tawn zel.
US Central Command (Centcom) chuan ‘Iranian sipaite theihna tichhe turin’ an bei tih an sawi a, hemi hma hian Iranian lawng chawlhna an dah kal zelah lawng an tir bawk tih an sawi.
Sorkar chanchinbu chuan US hian lei, rel station leh thlawhna tumhmun telin civil mite hmun an bei tih an tar lang a. Hormozgan province-a Bandar Abbas khawthlang lama lei an kap video pawh a darh.
Iran-a Revolutionary Guards (IRGC) chuan chhan let nan Oman-a US maritime surveillance radar hmun bakah Kuwait leh Bahrain-a an hmunte an kap ve tih an sawi a. Syria-a US special operations command centre an bei bawk tih an sawi.
IRGC chuan Jordan nena an inrina bul lawk, Syria-a al-Tanf an beih thut hi ni hnih kal taa Iranian sipai thah phuba lakna a nih thu an sawi a. Syria leh US chuan engmah an la sawi lo.
Kar kal ta Zirtawpni khan Jordan-a sipaite chuan Iranian missile pathum an kap thla a, thi leh hliam leh thil chhia a awm lo tih an lo sawi tawh.
Iraq-a Kurdish sipaite pawhin Erbil khawpuiah drone pariat an kap thla a, thi leh hliam an awm lo niin an sawi bawk.
Inbeihna a kal mek lai hian Iran vaukama tuikawng pawimawh, Strait of Hormuz chu Tehran chuan a la khar zui zel.
Hei vang hian tuialhthei phurh chhuah a buai phah a, International Energy Agency chief Fatih Birol-a chuan khawvel pumah energy-ah harsatna a awm phah thei tih a sawi.
Zirtawpni khan Chinese leh Pakistani foreign minister-te chuan US leh Iran chu indo titawpa inbe turin an ngen.
US-in Ningani zana a beihnaah hian Qeshm thliarkar bul lek chhim lama nuclear power plant awmna, Bandar Abbas leh Bushehr te pawh a kap tel.
Centcom chuan lei an kap tel tih sawi lovin ‘Iranian sipaite hmun tam tak’ an kah thu chauh an sawi a. Jet, drone leh lawng hmangin ‘vaukam thlithlaina leh air defense hmun, sipaite bungraw chhekna leh tuipuia chetna thil’ an kap tih chauh an sawi.
United Kingdom Maritime Trade Operations chuan Ningani khan Oman-a Khasab khawchhak lam, vaukam atanga km 35 vela hlaah eng nge tih hriat lohvin tuialhthei phur lawng a fuh tih a sawi a, a thawkte an him vek tih a sawi bawk.
Kar tirah khan US President Donald Trump-a chuan Iran chu inbe tura a kir lo a nih chuan an lei leh power plant beihah a lo vau tawh a ni.
Iranian sorkar chanchinbu chuan Washington hian Iran chhimchhaka Iranshahr Airport, vaukama Bandar Khamir-a el station leh lei panga an kap bawk tih an tar lang.
Mi pasarih an thi niin sorkar news agency IRNA chuan a tar lang bawk.