Hydrogen hmang rel nei ram tlem zingah India tel thar

Indian Prime Minister Narendra Modi-a chuan Zirtawpni khan hydrogen chakna hmang rel a tlangzarh ta a, boruak tibawlhhlawh thei khu engmah pe chhuak lo rel nei thei ram tlem zingah a tel thar.
India hi hetiang rel tlantir thei ram – Germany, Japan, China leh US ang ram tlem zingah a tel ta a. Hetiang rel hian sa leh tuihu chauh a pe chhuak a, diesel hmang lakah chuan khuarel tan a him zawk em em a ni.
Modi-a’n a vai liam tak rel tharah hian pindan 10 awmin mi 2,600 an chuang thei a, hmar lama ram khawpui ber, Delhi nena inria awm, Haryana-ah Jind leh Sonipat inkarah ni khatah vawi hnih a tlan thin dawn a ni.
Hydrogen rel thar, km 90-a thui tlan thin tur a vai liamnaah Modi-a hian India-in tha leh tlo, a chuan man pawh tlawm zawk tlanna tipung turin hma a la zel dawn tih a sawi.
“Project hi technology thiamna sang tak nen hydrogen dah khawl, thun khah leh a kalna kawng siam nena tangkawma kalpui a ni,” tiin vai liam hma nia sorkar thuchhuah chuan a tar lang.
Rel thar hi a duan, a siam leh a sak chu India-a tih vek niin darkar khatah km 75 thlenga chaka tlan thei tur niin 1,200-kilowatt hydrogen fuel cell propulsion system hmang a ni.
India hi khawvela rel kawng nei sei ber pakhat niin km 70,000 vela thui a neih chu electric hmang turin a thlak kim tep tawh a, kum 2030-ah chuan boruak tibawlhhlawh thei ang chi khu engmah pe chhuak lo tur rel tlantir vek hman a tum a ni.