AR chhuahsan ramah Vanapa Hall thar Ram hman dan tur Committee ruahman: – Chief minister

Aizawl lailia Assam Rifles sawnchhuahna ramah Vanapa Hall thar sak a ni dawn a, a sak dan tur ruahman pawh thlan a ni tawh. Chief minister Lalduhoma chuan AR chhuahsan ram hman dan turah hian mipui zawng zawng aiawh zo Advisory Committee an din tih a sawi nawn.
Assam Rifles ram chhuahsana hmalakna kal meka nodal department UD&PA buatsaihin Vanapa Hall & Park Architectural Design hman tur intihsiak chu Thawhtanni khan result puan a ni a. Catalyst Architecture Studio-in a design chu thlan a ni.
Lawmman hlanna hmanpuitu chief minister chuan, Aizawl chu a tirah Saphoin an thiam ang angin lo plan ve mah se, ziaka inhnutchhiah engmah a awm loa, India zalenna hmuh hnuah a tlachawp zela ngaihtuah chungin luah chhoh a ni a. Hma kan sawn zel a, a hunlaia kawngpui zau tawk tak nia ngaih kha tunah chuan a lo zau tawk ta loa, hall liantham tak nia ngaih pawh a lo te ta a, kawngpui zau zawk, puipunna hmun tha zawk, park nuam tak mamawhna a lo sang ta hle tih a sawi a ni.
Aizawl lailia Assam Rifles luah ram chu Pathian zarah mipui kutah a awm tawh a. A hman dan tur ngaihtuahtu Advisory Committee, mipui zawng zawng aiawh zo an din chuan hmalakna tur a duang a, master plan a siam a, chu’ng zingah chuan Vanapa Hall thar sak hi a tel tih a sawi.
“Advisory Committee ruahmanna hi ram danga khawpui mawi tak tak mitthla chungin, rualelna thinlung pu a, kan ram hmel lanna tur, kum tam tak lo la awm tur thlenga kan tangkaipui theih ngaihtuah chunga kalpui a ni. Vanapa Hall & Park pawh hi khawpui laili taka awm tur, puipunna hmun langsar ber tur a nih angin, mawi si, tha si, him si nise kan duh a. Miin Aizawl an mitthla ruala an mitthlaa lo lang ve nghal tur centre mawi tak sak kan duh a ni. Chutiang hall leh park mawi sak dan tur chu ‘architectural design competition’ buatsaih hmanga thlan a thain kan hria a. UD&PA-in bawhzuiin, a hmawr kan bawk thei ta a ni,” Lalduhoma hian a ti.
Intihsiaka pakhatna latu Pu Lalrinzuala Ralte chu 35th JK Indian Architect of the Year 2026 lawmman dawngtu a ni tih a hriatin, India rama architect thiam ber kuta Vanapa Hall & Park design a awm chu lawmawm a tih thu chief minister hian a sawi a. Hall sakna tur hi sum ruahmansa la awm lo mah se, PM-DevINE hmanga sak an tum dawn a. Concept paper leh detail project report chak taka umzui turin concerned department a chah tih a sawi a ni.
UD&PA minister K Sapdanga pawhin, Aizawl hmel thar, changkang tak, mipui hman tangkai tur, miten an tlawh chak em em tur sawrkarin a duang mek a. A taka chantir thuai an tum tih a sawi.
Pakhatna dawngtu Catalyst Architecture Studio hian hall & park design hi a lem nena entirin an sawifiah nghal a ni.
Inelna hi kumin March 17 khan tan a ni a, firm 33 tel zingah state dang firm pawh an awm. Thehluh hun tura hun tiam May 15 khan firm 16-in an design an thehlut a, an zinga 14 pawm a ni. Endiktuten kil hrang hrang atangin an endik a, a titha zual firm 6 an thlang a, chu’ng chuan an design hi endiktute hmaah an sawifiah a ni. Endikna kalpuina atan hian thla thum chhung hun hman a ni.
Architectural firm pathum hnenah consolation prize hlan an ni a, firm dang pahnih hnenah honorarium hlan an ni bawk. UD&PA chuan Vanapa Hall & Park Architectural Design Exhibition hi an kalpui nghal a, July 22 thleng I&PR Conference Hall Treasury Square-ah tlawh theih a ni.