Indian thalaiten Delhi-ah kawng zawh, sorkarin biak tum

Indian thalaiten Delhi-ah kawng zawh, sorkarin biak tum
India-a thalai kaihhruai Cockroach Janta Party (CJP) movement chuan police-ten tear gas leh tiang hmanga hnawh darh tuma beih an ni chungin parliament panin mi sang telin kawng an zawh a, hetih lai hian union minister chuan sorkarin an thil phutte ngaihtuah a tiam niin an sawi.
Thla tam tak chhunga lungawi loh leh nawrh huaihawt hi Prime Minister Narendra Modi-a sorkar term thumnaah vantlang huapa dodalna lantirna lian bera ngaih a ni a, eptu party-te thlawpna an hmuh hma atangin social media-ah thlawptu maktaduai tam tak a hip khawm a ni.
Zirtawpnia police-in chaw ngheia nawrtu activist Sonam Wangchuk-a tihluihna hmanga damdawi ina an sawn chuan exam zawhna put vanga Union Education Minister Dharmendra Pradhan-a bân phuta punkhawmna hi a tichak sauh.
Parliament fur thutkhawm tan ni, Thawhtanni khan New Delhi-a Jantar Mantar-ah thalai sang tam tak an pungkhawm a ni.
“Bâng rawh se,” tiin an au va. “Dharmendra Pradhan a chhuak rawh se,” “Narendra Modi-a bâng rawh se,” tih te chu Hindi-in an aupui a ni.
Khawpui hmun hrang hrangah police leh paramilitary mi tam tak dah an ni a, nawrh huaihawtte auva ram puanzarh an vau suau suau chu tihtawp tumi8n an bei a ni.
Union Health Minister J.P. Nadda chuan sorkar laka CJP thil phut sawiho turin a ko niin CJP thupuangtu, Ashutosh Ranka chuan Thawhtanni khan X-ah a tar lang.
An thil phut zingah hian Wangchuk-a chhuah te, Pradhan-a bân te, zawhna put ru avanga mahni intihhlumte zangnadawmna Rs. maktaduai 10 theuh pekte a tel tih chanchinbute chuan an tar lang a, intihlum hi mi 20 vel nia hriat a ni.
He chanchin ziah lai hian inbe tur hian indawr a ni em tih hi Nadda emaw, sorkar emaw chuan engmah an la sawi lo va, an indawr zui em tih pawh hriat hman a ni lo.
CJP hian a , dintu Abhijeet Dipke-a man emaw, hren emaw a nih loh thu an sawi bawk.
Mi thiamte chuan Indian thalai zingah hna thawh tur tlem leh exam zawhna put awm fo avanga lungawi lohna awmin CJP a tilar chak hle niin an sawi.
Reuters chuan thalai sang tel lungawi loh lantirnaah hian an pung khawm a, police-ten Delhi laili pan an tumna kawngah dalna (barricade) an dah ve thung a, khawpuia lirthei veivak pawh a buai phah hle tih a tar lang.
Television-a video tihchhuahah chuan police hian hmun pakhatah mi thenkhat chu an vua tih a lang a, Delhi police erawh chuan tharum an hmang lo tih sawiin ‘professional takin kan hmachhawn’ tih an sawi.
Reuters chuan venhim hna thawktute hian parliament bulah pungkhawm an tam viau hnuah a hnawh darh nan tear gas pawh an kap niin an sawi a, mipui atangin lunga police vawm pawh an awm tih a tar lang.
CJP movement hi May thlaah ram puma medical zirna sikula lut thei tur zawnna exam zawhna a put hnu lawka intan a ni a, zawhna put avanga exam buatsaih nawnah zirlai maktaduai hnih chuang an inlan.
Dipke-a leh amah thlawptute chuan thla hmasa atang khan Pradhan-a bân phutin sit-in demonstration an lantir tan a. Wangchuk-a’n June 28-ah chaw ngheiin a zawm zui.
Wangchuk-a hian damdawi in thuneitute hnenah kut ziakin Thawhtannia kawng zawha a tel theih nan dilna a thlen.
Thawhtanni chawhma khan sorkarin a duh pathum an tihhlawhtlin chuan a chaw nghei a tawpsan tur thu a sawi a. Tun hnaia zirna kalpui dana hlawhchhamna leh zawhna puta mawhphurhna an lak a phut tel.
MP leh political party hruaituten damdawi ina an hmuha a duhte tha taka an sawipui theih chuan chaw nghei tawpsan a tum bawk.