Russia-in Ukraine vaukama lawng a kahnaah mi 10 thi

Russian-ten Ukraine-a Odesa vaukama bungraw phur lawng an kahnaah mi 10 an thi.
Guinea-Bissau flag tar lawng hi Pathianni khan Russian cruise missile hmanga kah niin Ukrainian Air Force chuan an sawi a, a kang nasa tih an sawi.
Zankhuain mi zawn leh chhanchhuah hna thawh a ni a. Thawhtanni tukah khan Ukraine-a tui lam thuneitute chuan thawktu pakua leh an thlawhna khalhtu pakhat a thih thu a sawi a. A hnuah India pawhin a mi pali an thi tel tih a sawi.
Tun hnaiah Odesa region hian beih a tawk nasa hle a. July thlaah ringawt hian Russian-te chetna avangin mi 28 an thi tawh niin regional head Oleh Kiper-a chuan Ukrainian TV hnenah a sawi.
Black Sea-a Russian-ten bungraw phur lawng an beih pawh a pung niin an sawi a. Pathiannia Golden Leo an beih hi thi an tam berna pakhat a ni.
Golden Leo ang chi ram dang lawngte hi Ukraine-a Romanian leh Bulgarian vaukam zawha Turkey pana tuipuia bungrua thawnna awm chhun an ni.
Ukraine hian lo atanga an thar chhuah hmun thuma thena hmun hnih, $ tluklehdingawn 9 vel chu tuipuia an thawn chhuah niin Kyiv tana sum hnar pawimawh a tling.
Ukrainian lawngte hi Russian-ten tuipui kam an thunun vek avangin Odesa thleng bak an kal thei lo va, Kyiv hian drone hmangin Moscow laka Black Sea khawchhak lama an hmunhmate vawn him tumin an bei nasa hle.
Hetih lai hian Russia chuan Ukraine thilte ram dang company-ten an phurh chhuah theih loh nan leh Black Sea luhka an hman theih loh nan bungraw phur lawngte an bei thar nasa hle.
Russian-te hian Ukraine khawchhak leh chhim lam khawpuite pawh a bei a, mi panga an thi.
UN chuan June thla khan April, 2022 hnua Ukrainian civil mi an thih tam ber thla niin a sawi a. Mi 293 vel thiin 1,990-in hliam an tuar.
Kyiv pawhin Russia-a Moscow region-a hmun pawimawh leh oil depot an bei ve bawk a. Mayor Sergei Sobyanin-a chuan Kyiv hian Pathianni zan leh Thawhtanni tuk khan drone 400 chuanga an beih thu leh a tam zawk an kah thlak thu a sawi a. Tual chhung thuneitute chuan mi 10-in hliam an tuar tih a sawi.
Ramri hnaih, Russia-a Belgorod region-ah Thawhtanni khan Ukrainian drone-in bus a fuhah naupang telin mi panga an thi bawk.