DP&AR ‘review meeting’ thlirletna

Nimin khan chief minister chuan, tun hnai lawk atanga a enkawl thar tak Department of Personel & Administrative Reforms (DP&AR) official-te a office-ah ko khawmin review meeting a neihpui a. Ramin hma a sawn theih nan siam that ngai siam tha tura theihtawp chhuah tlang turin officer-te a sawm a.
DP&AR hi sawrkar hnathawkte enkawla viltu ber a ni a, tun hnaia he department hming a han lar zauh chhan pawh kha sawrkar hnathawk pension tawh rawih nawn chungchang a nih kha. He thil hi chinfel a ni tawh a, tuna kan han sawi chhuah zauh chhan hi, thu mu hnu kaih thawh tumna ni lovin, DP&AR dinhmun leh mawhphurhna pawimawhzia tarlanna lam a ni zawk mah awm e.
Review meeting-a report sawi zui chakawm tak pakhat chu MPSC hnathawh dan tarlan chungchang hi a ni.
MPSC hian sorkar kum 2025-26 chhungin Exam vawi 142 an kalpui a, result chi 57 an puang hman a, DPC vawi 292 an thu bawk. Hetia han ngaih mai hi chuan, heti zat zat kum khat chhunga exam huaihawt chunga DPC vawi 292 an thu bawk a nih chuan, thawk lakna hun an nei mang dawn lo tihna a ni ber awm e.
Kum khatah ni 365 a awm a, chawlhni vawi 52 a awm a, chumi paih chuan hnathawhna hun hi ni 313 an nei tihna a ni (Inrinni telin). Exam vawi 142 an kalpui a nih chuan, ni hnih dan zelah exam an huaihawt (conduct) a, result chi 57 an puang hman bawk tihna a ni a. Chutih laiin MPSC tel lova kal thei lo Departmental Promotion Committee (DPC) vawi 292 an la thukhawm cheu a nih phei chuan, chu chu ni tin vawikhat thukhawm ang thuak an ni. Chutih laiin, MPSC hi staff indaihlohna nei mek anga sawi a la ni lehnghal. Heti taka hah an nih chuan, hnain a tawrh phah chang a lo awm a nih pawhin, ‘a mawh lo e’ tih mai a awl viau dawn tihna a ni.
Right to Public Services Act chungchangah report petu Commissioner & Secretary chuan DP&AR online-a kalpui a nih tawh thu leh Right to Public Services-ah tihhlawhtlin theih service chauh dah a pawimawh thu a sawi a. Hei pawh hi thil pawimawh leh serious tak niin a lang.
Tuna hriat theih chinah chuan, The Mizoram Right to Public Services Act, 2015 hnuaiah department hrang hranga service notified zat hi 141 nia hriat a ni a. DP&AR Commissioner & Secretary hian heng service notified 141 zingah hian tihhlawhtlin theih loh service a awm, a tihna tluk a ni awm e. ‘Quantity aiin quality’ tih ang deuh khan, service hi kel-êk tam duah lovin, tlem rem rawm pawh ni se, kha service kha mipui innghah ngamna a nih phawt chuan, chumi hmang chuan ngaihngam takin mipuiin plan an siam ve thei tawh dawn a ni.