Bangladesh atanga tlanchhiate dawnsawn dan tur ngaihtuah ngun a ngai: HM

Home minister K Sapdanga chuan Bangladesh atanga Mizorama tlanchhiate chungchangah, Bangladesh lamah an him loh chuan Mizorama tlanchhia an awm zel tura rin a nih thu a sawi a, lo dawnsawn dan tur ngun taka ngaihtuah a ngai tih a sawi.Ningani khan Zozam Times buatsaih seminar, ‘Bangladesh tribal chimral mekin Mizoram a nghawng heih dan leh Chittagong Accord’ tih thupui zirhonaah khuallian niin home minister hian Bangladesh atanga Mizorama tlanchhiate chungchang hi a sawi a ni.
I&PR Auditorium-a hun hmanah home minister K Sapdanga chuan, Mizoram, Chin Hills leh Bangladesh-a Chittagong Hill Tracts-a Zo hnahthlakte chu rorelna hran hnuaia an awm thu a sawi a, 1971-ah khan Chittagong Hill Tracts (CHT) huam chhunga tlang mite’n rorelna hran neih an duh thu an aupui tawh thu, Bangladesh pian hnuah an duh ang an hmuh chuan loh thu te sawiin, an thil ngiat tihhlawhtlin a nih theih nan ralthuam an lek a, 1997-ah Bangladesh sorkar nen inremin Chittagong Hill Tracts Peace Accord an ziah tak thu, mahse he inremna bawhzui danah tlang mite an lungawi loh thu te a sawi.
Harsatna a nasa telh telh a, phai ram tawt taka mite CHT tlang ramah an lut tam telh telh a, an chep telh telh avangin an tlanchhiat a ngai tih te sawiin, “Ngaihtuah ngai ta em em chu, Bangladesh atanga Mizorama tlanchhia Zo hnahthlakte leh Zo hnahthlak ni lote hi eng tianga lo dawnsawn tur nge tih hi a ni,” a ti.
Khualzahawm Lalmuanpuia Punte, MLA, adviser to chief minister pawhin thu a sawi a, Mizoram mipuiin Myanmar leh Manipur-a kan unaute dinhmun kan hriat fu laiin Bangladesh-a kan unaute dinhmun erawh kan hre vak lo nia a lan thu a sawi.
CHT-a Zo hnahthlakte hi an hrehawm chuan Mizorama tlanchhia an pung ang tih a chian thu a sawi a, Myanmar-a Zo hnahthlakte pawh an raltit chuan Mizoramah an pung a, democracy rorelna hnuaia an awma Myanmar a ralmuan chuan Mizoramah awmpui tur pawh an tlem nghal mai thu te sawiin, CHT-a Zo hnahthlakte pawh chutiang chu an nih a rinawm thu a sawi. Kan chhehvela mite dinhmun hriat chian a ngaih thu a sawi a, chu chu Mizoram tan thil pawimawh a nih thu te a sawi.
Zozam Times editor Tuikhuahthanga kaihhruaia hun hmanah hian Dr Lalrinnunga, Mizoram University-a history zirtirtuin CHT-a Zo hnahthlakte leh tlang mi dangte chungchang a sawi a, CHT-ah hian tlang mite an chep telh telh thu, phaia chengte’n an chim nasat thu te leh CHT-ah hian Zo hnahthlak an tlem telh telh tih te a sawi.