Modi-a’n zawhna put ngaihtuah tuah fast-track court din tiam

Modi-a’n zawhna put ngaihtuah tuah fast-track court din tiam
Indian Prime Minister Narendra ​Modi-a chu thalaiten lungawi lohna nasa tak an lantir phah mekna leh education minister bâng tura an nawr phah, exam zawhna put chungchangah a tawng chhuak ve ta a, Ningani khan hemi phena awmte chu an chungthu ngaihtuahtu tur ‘fast-track’ court din a nih tur thu a sawi.
Hetih lai hian lungawi lo leh eptu party-te chuan Modi-a rawtna siam hi hnawlin Education Minister Dharmendra Pradhan-a chu a bân hmasak phawt an phut a, eptute chuan a ni li nan parliament rorel inkhawm an tibuai leh bawk.
Nilaini zan khan lungawi lote leh police chu New Delhi kawtthlerah innawr lehin officer-te hian tear gas leh wielding cane hmangin an nawr let.
Tun tuma lungawi loh lantirna hi kum 2014 atanga thuneihna chang tawh, Modi-a sorkarin thalaite lak atanga chona an hmachhawn lian ber a tling mek a. Eptu party-te chuan thalaite thil phut chu kartir atanga tan, parliament fur thutkhawm tihbuai phah nan an hmang mek bawk.
Kum 2024 atanga a term thumna chelh tan, Modi-a sorkar tan buaina lian hmasa ber a ni.
“Kan thalaite thatna leh hma lam tluka pawimawh a awm lo,” tiin Modi-a chuan X-ah a tar lang.
“Zawhna put kaihhnawih rel tur leh na taka hremna pe turin fast-track court din turin thutlukna kan siam a ni,” a ti a. Thalaite hmakhua tichhia chu tumah an zuah loh tur thu a sawi bawk.
Fast-track court hi India-a thubuai ngaihtuah leh thurem muang tak kara rang taka ngaihtuah theihna leh thutlukna siam zung zung theihna a ni.
Hetiang special court-te hi hmeichhia leh naupangte laka mipat hmeichhiatnaa dan bawhchhiatna, firfiaka chetna, sum chhehrelh leh dan siamtuten dan an bawhchhiatna te an ngaihtuah deuh bik thin.
Cockroach Janta Party (CJP)-in thla hmasa atanga zirlai maktaduai hnih chuangin an beih thin exam zawhna put ru duh lohna hi an lantir tan a, zawhna put ru avang hian mi tam tak intihlum an awm tawh.
CJP thupuangtu, Ashutosh Ranka chuan court thlen chu rahbi pawimawh a nih thu a sawi a. “Mahse, Pu Modi, engvangin nge he ramah hian zawhna hi a put theih?” a ti.
“Fast-track court hi thil dangah pawh siam a ni a; mahse, heng court hian buaina a ching fel dawn em — he zawhna chhanna hi i hria,” a ti.
CJP dintu, Abhijeet Dipke-a chuan Pradhan-a a bân hma chu an kal zel dawn tih a sawi.
India-a eptu party lian ber, Congress hruaitu, Rahul Gandhi-a chuan Modi-a hian thalaite hma hun a tichhia tih a sawi.
Eptu MP-te chuan parliament building-ah placard keng leh au rualin Pradhan-a bân an phutna an lantir a, a chhungah rorel tikhaihlakin inkhawm vawi tam tihtawp lailawk a ni.
Modi-a kaihhruai BJP leh an thawhpuite pawhin zawhna put hi sawiho phutna an lantir a. Minister-te chuan eptute chuan ti tak tak tawk lo va, parliamentary-a sawiho an tum lo niin an puh let.
Nilaini zan khan New Delhi lailia lungawi loh lantirna hmun, Jantan Mantar-ah chuan mi 10,000 chuang an pungkhawm niin tual chhung chanchinbuten an sawi a. Thenkhat chuan police-te hi lung leh plastic umin an vawm a, officer inhliam thenkhat chu damdawi inah dah an ni tih Delhi Police chuan an sawi tih news agency ANI chuan a tar lang.
Ningani chawhnu khan pungkhawm an awm leh a, venhimna khauh tak karah sorkar duh lohna poster kengin an au rual bawk.
Delhi ​Metro Rail Corp. chuan Ningani atang khan tiam chun awm lovin Delhi laili vela station 16 an khar tih an sawi a, venhimna thila hetianga an tih hi a vawi hnihna chauh a ni.
Lungawi lohna nasa tak karah hian Modi-a sorkar hi CJP hruaitute nen vawi khat an inbe tawh a, an thil phutte en leh exam kalphung siam that pawh an tiam.
CJP hi online-a indin niin thalai tam takin an thlawp zui.
Indian thalai zingah hna vang te, exam zawhna put fo avangin a thawm a lian chak hle.