India nena thil khirh bik buaipui dun kan inpeih – Chinese FM
China chuan India nena buaina khirhkhan bikte uluk taka buaipui dun turin a inpeih a, ram pahnihte inlaichinna lama hmasawnna tha tak tihngheh tumin hma a la tih an Foreign Minister Wang Yi-a’n a sawi.
Manila-a ASEAN kaihhnawih meeting neih mek karah Indian External Affairs Minister S Jaishankar-a nen Nilainia an inkawmnaah Wang-a chuan ram pahnih hruaitute inhriatthiam tawnna pawimawh tak takte tihhlawhtlinna tur te, mi pawimawhte inkawmna nghet neih te, eibar leh sumdawnna, media leh mihring leh nunphung inhlan tawnna kawngah te thawhhona tichak turin India nen thawhdun a inpeih thu a sawi.
“China chu ram pahnihte inkara buaina khirh bikte chu uluk taka buaipui dun turin a inpeih reng a ni,” a ti bawk.
Ram pahnihte chu mihringte hamthatna ngaihtuah reng turin a ngen a, “China leh India chuan ram liante mawhphurhna beisei an lantir a ngai a, ram pahnihte inlaichinnaa hmasawnna tha chu tihngheha khawvel huap leh an chhehvela mite nena inkungkaihna inremna leh thawhhona tihchak a ngai a ni,” tiin Chinese foreign minister chuan a sawi.
Wang-a hian khawvel puma inlaichinna tipunga mipui rorelna kalhmang tihhmasawn kawngah tha tak tak thawhho a tul thu a sawi bawk.
BRICS inkaihhruaina hnuaia inremna leh thawhhona tihchak a tul thu a sawi bawk a, “Ram pahnihte chu tha zawka an thawhho a ngai a, ram changkang zawkte hlawkna inang tlang zawkte aiawh leh humhalh a ngai a ni,” a ti.
Kumin chhunga BRICS summit hlawhtling tak buatsaih turin China chuan India chu a thlawp chhunzawm zel dawn niin Wang-a chuan a sawi tih an sorkar hnuaia mi, Xinhua news agency chuan a tar lang.
Wang-a leh Jaishankar-a te pahnih hi Association of Southeast Asian Nations (ASEAN) nena inzawm meeting-a tel turin Manila-ah an awm a ni.
India hian September thla hian New Delhi-ah BRICS summit a thleng dawn a. A tir chuan member panga awmna niin Brazil, Russia, India, China leh South Africa (BRICS) te an ni a, he pawl hi a lian zel a, Egypt, Ethiopia, Indonesia, Iran, Saudi Arabia leh United Arab Emirates te pawh a huam tel tawh a ni.