Voter ID lema roll-a luh tum manchhuak

Special Intensive Revision 2026 atana hearing neih mekah Lunglei district-a khaw pakhatah chuan voter ID lem hmanga luh tum manchhuah an ni a. Hetihlai hian Lawngtlai district-a khaw pakhatah chuan hearing neiha thuneitu ber zu a ruih avangin koh haw a nih thu sawi a ni.
SIR 2026 of Electorall Roll neih mekah thun leh paih leh insawn chungchanga thutawp siam turin hmun hrang hrangah hearing neih mek a ni a, a hun bituk sa a zo tep tawh. Hetihlai hian hearing viltu tlawmngai pawl lamin thil dik lo leh thawktu fel lo an hmuhchhuah belh zel a ni.
Thudawn danin, kar kalta tawp lama Lunglei district Tlabung chhehvela SIR hearing neih viltu YMA Sub Hqrs. Lunglei atanga thawkchhuakte chuan Lamthai khuaah voter ID lem hmanga electoral roll-a luh tum mi paruk an manchhuak a, Bangladesh mi a nih angin an zinga pakhat hi chu Bangladesh lamah a tlanchhe hman nia sawi a ni.
Midang panga hnen atanga YMA hruaitute thudawn danin, voter ID hi Lamthai (Tablabagh) khua ami, voter ID nei sa te number hmanga siam a ni a, a neitu dik takte hi roll atanga paih an ni thung. Voter ID lem buaipui saktu hi Lamthai khaw VC member pakhat nau a ni a, Aizawl lamah a ni hian Mizo pakhat, hetiang lam khawih thin hnenah hlanchhawngin, mi pakhat hian Rs. 6000 an chawi a ni.
Voter ID lem siamtu hi Tribal cedrtificate lem pawh a siam thin tih sawi a ni a. Marpara leh a chhehvelah pawh Birth certificate lem siamsak thintu an awm tih thu dawn a ni a. Sub Hqrs. YMA hian FIR thehluh a, a tul anga bawhzui an tum thu sawi a ni.
Hetihlai hian kar kalta vek khan Lawngtlai district-a Borapansury khuaah SIR hearing neih meka electoral registration officer (ERO) chu zu a rui thin hle a, a hna a thawk thei meuh lo tih report a lut a. Hemi hi district election officer Lawngtlai chuan bawhzuiin, ERO hi koh haw a ni a, he khuaa hearing neih tawh pawh hi assistant ERO hoa tih that leh tura ruahman a ni. He thilah hian Central YMA pawhin hma an la tih thu dawn a ni.