State pawn balu lut tur dang tan

Tipper hmanga eizawngtu pawl pathum intelkhawm chuan an lo sawi lawk tawh angin August 1 atang khan state pawn atanga balu phurluh tur chu Mizoram hmun hnihah an dang a, hriat theih chinah man ngai an la awm lo.
Mizoram Tipper Association Joint Committee hruaitute sawi danin, August 1 atang khan Phunchawng leh Kolasib Tuithavengah duty insiamin, nitin darkar 24 chhung an duty tan a. State pawn balu phur hrim hrim chu Mizo lirthei pawh nise dan vek an tum tih an sawi.
An duty chinah chuan Assam atanga balu phurlut dan ngai an awm lo tih thu dawn a ni. An duty na hmun paltlang balu phurte chu Mizoram chhung ami balu an phur ngei tih finfiahna an neih leh neih loh an lo endik sak a. Police lamin boruak duhawm lo thleng thei vengin an awm chilh ve bawk.
Assam balu phurhluh khap ni mah se, Mizoram balu in min chawm hneh tho avangin in sak mekte tan thlaphanna tur a awm lo tih Joint Committee hruaitute hian an sawi a. Chutihrualin Langkaih leh Mizoram hmun danga balu hralha eizawngte chu an balu man tih to phah lo turin an ngen tih an sawi a ni.
Tipper hmanga eizawng pawl hian thuthar thehdarhtute hnena an lo sawi tawh danin, Dholai leh Lailapur inkar vel atanga balu var an lak thinah kumin July 15 khan Assam Forest mite chuan an member pali (tipper pali) an man a, load an lak hnu, balu man an inpek fel hnu ah chauh an man a, hetianga an buai hnu pawh hian Assam lam mi balu phur erawh an kaltlang tir tho.
July 22 tlai khan heng balu phur an mante hi Rs. 13000 chawitirin an chhuah chauh a, tipper neitute leh a khalhtute hian hemi zat aia tam hi a neuh neuhah an la sen belh a, an hren chhung hian Assam lam atangin enkawlna mumal an dawng lem lo tih an sawi.
Balu neitu (mahaldar) te hnena an thlen pawhin puih tumna an nei loa, an hriat zui danin, mahaldar-te hian balu an hralhah hian Assam sawrkarah royalty an lo pe ngai loa, tuna hma rawn latute pawh hi Silchar lam official niloin, Guwahati atanga rawn kal nia an hriat thu an sawi a. Chutihlaiin mahaldar-te chunga hma la loa, an hnen atanga balu latute chunga an tuan daih chu an hrethiam lo tih an sawi a ni.
Heng lai hmuna balu lakah hian tunhma atang tawhin hnam inthliarna an lo tawng fo tawh tih an sawi a. Mizoram atanga balu late chuan sumfai chawi tur neuh neuh an ngah bik a, hei vang hian Mizorama an hralh lehnaah pawh Assam mi lamin an phurh aiin a man a insan hleih lo thei thin lo tih an sawi a ni.