Ni 37 chhung ruah sur

Tun hnaiah Mizoramah ruah a sur deuh reng a, a sur char char ti hiala sawi theih khawp a ni. Aizawlah chuan a zawnin ni tin ni 37 chhung ruah hi a sur.
July ni 31-ah ruah a sur lo a, June ni 24 atang khan July ni 30 thlengin ruah a sur. Ni 37 chhung chu ni tin a sur a; chhum lo chat lova sur chu a ni lo, chawhma lama a sur loh ni te, zan lamah a sur loh ni te pawh a awm thin.
Ni 37 chhung a sur na a, ruah hi tam tlawrh tlawrha sur chu a ni lo. Tlem te tea a sur ni a awm fo a, a sur tam ni-ah pawh a tam vak chuang lo.
State Meteorological Centre chhinchhiahna enin, July ni 21-ah khan ruah tui mm 46.6 a tla a, hei hi ni 37 chhunga a sur tam ber ni a ni.
An chhinchhiah danin, July thla chhung khan ruah hi mm 305.6 a tla a, hei hi a tlem lo na a, July thlaa surah chuan a tam tia sawi tur khawp chu a ni lo. Nikum khan July thlaah mm 495.3 a sur a, 2024 July-ah mm 358.5 a sur. Kumin July-ah a sur deuh reng na a, a tam lem lo tih a lang.
State Meteorological Centre-in an chhinchhiah danin, kuminah, July thla thlengin ruah hi mm 1254.1 a sur tawh.
Kumin hian July-ah chauh ni lovin thla dangah pawh ruah hi tam tlawrh tlawrhin a sur khat a, ruah sur ni a tam na a, ruah tui hi tam tham takin a sur vak lo.
Sawi tawh angin, July thlaah ruah tui tla belhkhawm a tam tia sawi tur khawp a ni lo na a, thla tluanin ruah chu a sur. July-ah ni 31 a awm a, ni khat chauh ruah sur loh ni a awm.