MIFCO-in Sialhawk lakhuihthei lei

Mizoram Food & Allied Industries Corporation (MIFCO) chuan Sialhawk leh a chhehvel khua atangin lakhuihthei a lei tan.
August 3 – Thawhtanni khan MIFCO hian Sialhawk atangin lakhuihthei quintal 200 vel an lei a, kg ah Rs.18 in a lak sak. Sialhawk khua hian nikum khan lakhuihthei quintal 13000 vel an thar a. Chu chu Mizoram pum thar chhuah atanga zaa 64 vel nia ngaih a ni. Kuminah Sialhawk bikin lakhuihthei quintal 14000 vel thar an inbeisei a, a chhehvel khua – Khawhai, New Chalrang, Chalrang leh Tlangpui nena an thar zawng zawng chu quintal 18000 vel a nih beisei a ni.
Mizoram sawrkar chuan MIFCO kaltlangin Sialhawk leh a chhehvel khuaa lakhuihthei leh sapthei huan panna kawngpui chhe tak tak la awm chu PCC (plain cement concrete) turin ruahmanna a siam tih thu dawn a ni bawk.
Sialhawk Pineapple Growers Society atanga thudawn danin, chief minister Pu Lalduhoma’n “Sialhawk leh a chhehvel khuaa lakhuihthei hi kuminah chuan hralhna an hriat loh avanga chhia pakhatmah a awm tawh tur a ni lo,” a tih tawh angin, MIFCO hian lakhuihthei thar chhung zawng chuan an lei char char dawn tih an sawi a. Chief minister, MIFCO chairman Pu Lalthazuala Rawite leh ZPM party chungah an lawm hle tih an sawi a ni.