Thla 21 chhungin buhfai quintal nuai khat chuang carry over hmangin kan humhim – B Lalchhanzova

Retaiter-ten thla tina buhfai an sem bang, a thla leh atana sem tura dahthat – ‘carry over’ an hman tan, 2024 April atanga kumin March thleng, thla 21 chhung khan buhfai quintal 105973.19 an humhim tawh tih Supply minister B Lalchhanzova chuan a sawi.
Thawhtannia ZPM party office-a inkhawmah FCS&CA minister hian, sawrkarna an chelh tirhah kudam tam tak ruak atangin bul an tan a. Retailer-ten thla tina buhfai an sem bang, thla leh atana sem tura dahthat an tih ‘carry over’ chu April 2024 atangin mumal deuhin an kalpui tan a. April 2024 atanga March 2026 chhung hian quintal 105973.19 humhim tawhin, open market procurement rate Rs. 3590 per quintal anga chhut chuan cheng vaibelchhe 38 man a ni tih a sawi.
“Carry over hman hma kum 2023 kha chuan kum khatah buhfai venhim zat hi quintal 4104.67 chauh a ni. Tunah hian retailer 1266 kan nei a, ZPM a sawrkar tak avanga retailer tanglaite sawrkar inthlak avanga ban an awm ka hre loa, dan ang takin an term an hmang zo zel a ni,” a ti.
Ration card var hmang mi 320523 awm mekin ration card sen hmang 121693 an awm a, ration card var leh sen hmang belhkhawmin 442216 niin, ration card zaa 37.7 an hauh a, hei hian Mizoram state-a chhungtin khawsak phung dinhmun hlimthla a tifiah viau tih minister hian a sawi a. Ration card eng leh pawl hmanga buhfai dawng mi 708191 kan awm mek a, kan state quota 1895-in kan khum mek a, ration card nei zawng zawng atanga chhutin NFSA hmang zaa 62.3 kan awm tih a sawi a ni.
Land Revenue & Settlement minister ni bawk B Lalchhanzova hian, apartment ownership chungchangah “The Mizoram Land Revenue Act 2013” Section108 to 114 ah in – a floor /a chhawnga lei theih dan a awm a, a bikin bank lama loan lakna atana hman dawnin harsatna a awm thin vangin kumin July 9 khan notification an tichhuak a, hei hian harsatna tam tak a sukiang dawn tih a sawi.
“Miin a ram landlease midang hnena a hman chhhawn tir theihnan 2025 November 21 khan notification tichhuakin, deputy commissioner-te thuneihna pek an ni a, miin a ram chu petrol pump leh sumdawnna dang atan sub-lease a mamawh chuan dan hnuaiah heng hi DC-ah a dil thei. e-Ram leh survey firm hman an nih hnuah hna kalphung a danglam chho a, online-a file a chet tawh avangin hotu lam leh a mipui lam pawhin file awmna chin kan hre thei zel tawh. e-Ram a an luhna an phone number dahah an file chet apiangin SMS leh Whatsapp hmangin update thin an ni a, ni 15 danah general update thawn thin an ni bawk,” a ti.
ZPM adviser B Lalchhanzova hian, mi thenkhatin an party chhung an buai tih an sawi thin thu sawi chhawngin, ZPM chu buai tak chunga din a ni a, mah se, a buai lo zawng hlirin an la kal thung tih a sawi. A hriat ve phak chinah ZPM a sawrkar hnu hian hna lak dan a rintlak chho hle a, advertisement chhuah loa hna lak an haw em em vek a, chutiang sawi tur a awm ta meuh lo tih sawiin, “Hei hian thangthar hna zawng mekte a ti lawm a, chhawmnun chhhoh zel hi kan bat a ni,” a ti.