Taxi chungchang bawk….

Mizoram State Transport Authority chuan taxi rate fel fai zawka kalpui a, taxi hmangtute leh a khalhtute tan pawha kawng hrang hranga him leh tangkai zawka hman a nih theih nan Digiride Technology Pvt. Ltd. NIT(Mizoram) nen tangdunin MizoTaxi application an siam a. STA ruahman angin, MizoTaxi app-a inziaklut taxi-te chu a enchhin nan July 10 atanga August 10 chhung ni tin service phalsak an ni a. July 31 thleng khan MizoTaxi app hman tuma taxi inziaklut hi four wheeler 391, two wheeler 1134, autorickshaw 24, an vaiin 1549 an ni a. Mipui lamah MizoTaxi app hman tuma mobile phone-a he app download/ install tu mi 22,000 chuang awmin, July thla chhung khan MizoTaxi app book-tu mi 5144 an awm hman a ni.
Aizawl khawpuiah hian four wheeler leh two wheeler taxi 3000 chuang ve ve, a vaiin taxi 6000 chuang an awm a, chung zinga 1549 chauh chuan MizoTaxi app hi an la hmang tihna a ni. Chumi awmzia chu, MizoTaxi App hmangtu zat Taxi hi 25% vel chauh an ni a, school exam result chu ni se, ‘Failed’ a ni ang a; tun dinhmunah MizoTaxi App chu a hlawhtling lo tihna a ni.
A nihna takah chuan, taxi permit neitute hi sawrkar dan zawm tura an intiam avanga taxi permit nei thei an ni a, an intiamna pawimawh ber chu ‘sawrkarin taxi fare a bituk ang an hmang tur a ni’ tih a ni.
Tichuan, sawrkarin taxi fare a bituk a, a bu a siam thlap a, chu chu taxi khalhtuten an service-naah an keng tel zel tur a ni. Passenger-ten fare an enchian duh hunah taxi driver-te hian fare book hi an phawrh zel tur a ni.
Hei hi taxi khalhtute hian an zawm lo a, sawrkar dan chu palzutin anmahni thuin taxi fare an bituk a, chu chu sawrkar approved taxi rate aia sang fê a ni. Mipui an phun luai luai a, mamawh hunah an hmang lo thei si lova, sawrkar lahin ‘pip e, pup e’ a ti lem si lova, taxi fare-ah hian mipui tawrhna a nasa tawh hle a ni.
Tichuan, taxi fare dik tak hmang duh lote chu sawrkar berin tihngaihna a hre lova, tuna rualkhai zawka mipuiin taxi fare an pek theihna tur App ruahman lah chu taxi service 75% vel chuan ‘kan hmang duh lo’ an ti leh ta tho mai.
Sawrkar taxi fare book hmang duh lo, Taxi App pawh hmang duh chuang lote hi, taxi service thenkhatin fare dik tak hmanga service an kalpui laiin, dik lo takin an service ve reng tho dawn tihna niawm tak a ni a. Hei hi eng Dan nge ni ta ang? Sawrkar hian dik lo taka taxi fare hmangtu service-te hi zalen takin mipui phurrit siam zel turin a en liam leh mai mai dawn tihna em ni ang le?