Exam dan siam that phutin Jharkhand-ah assembly panin kawng zawh

India khawchhak lam, Jharkhand-ah exam kalphung siam that phutin mi sang telin state assembly panin kawng an zawh.
Thawhtannia kawng zawh hi a tlangpuiin a muanawm a; mahse, police-in hmun thenkhatah a hnawh darh nan tuiin an phuh a, tiangin an vaw bawk niin BBC Hindi-in a tar lang.
Zirlai, hna zawng lai leh mi thahnemngaiten state khawpui, Ranchi-ah an thil phut lantirin chawlhkar hnih chuangin hun an lo hmang tawh a, state sorkara exam system siam that an duh.
An thil phutte sawipuiin sorkar nen vawi tam inbe tawhin thenkhatte chu pawmsak ni mah se lungawi lohna lantirtute hian an duh ang tawk tihpuitlin a nih hma chuan an kal zel dawn tih an sawi.
Tun hnai lawkah hian India-ah hian khawpui ber, Delhi-ah thalai sang telin exam zawhna put duh lohna lantirin parliament panin kawng an zawh tawh a. He thil hian ram pum luahin boruak pawh a lian hle.
Chawlhkar nga zet nawrhna an huaihawt hnuah thalai rualte telna, Cockroach Janta Party (CJP) chuan Education Minister Dharmendra Pradhan-a a bân hnuah an tin chauh a ni.
CJP hian ram chhung hmun hrang hrang atangin zirlaite a hip nasa hle.
Ranchi khawpuia kawng zawhnaah hian police leh kawng zawha tel mi sang tel awmin chanchinbu mite pawh an awm a, venhimna pawh khauh taka kalpui a ni.
Jharkhand-a lungawi loh lantirtute hi Ranchi-a khelmualah July 25 atang khan an awm khawm tan a, thenkhat chu a zawlah muin thenkhat chuan chaw an nghei bawk.
An lungawi lohna pui ber hi Jharkhand Public Service Commission (JPSC)-in April thlaa preliminary civil service exam a buatsaih dan atanga intan a ni.
July thlaa result a chhuah khan a beitu thenkhatten social media-ah chhanna lehkha nia sawi an thehdarh a, a tling zinga thenkhat chuan beisei phak bakin zawhna an chhang tlem tih a lang.
He thil hian result chu phuahchawp, duhsak bik tihtlin ni theia ngaihna a siam ta a ni.
Sorkar chuan zirlaiten an dikna chanvo an hmu ngei dawn tih a sawi a. An puhna hi Jharkhand-a Criminal Investigation Department (CID)-in chhui nghalin man pawh an nei nual tawh.
Pathianni tlai khan sorkar leh lungawi lote hi an inbia a, exam chu cancel an tiam a, a dang pahnih pawh cancel an tum a. JPSC member pathum an bang bawk nia sawi a ni.
July 22 khan JPSC chairman L Khiangte chu a lo bang tawh a, ani pawh hi chhuituten an kawm tawh.
CJP-in lungawi lohna an lantir ang lo deuhvin Ranchi-ah hian politic-a thlawptu leh puitu an nei tha a. Jharkhand-a eptu, BJP chuan state assembly-ah lungawi lohna lantirn sorkar laipui hnuaia mite chhui an ngiat a. State sorkara tel, Congress pawhin zirlaite hi an thlawp bawk.
Pathianni khan Jharkhand chief minister, Jharkhand Mukti Morcha (JMM) party chief ni bawk, Hemant Soren-a chuan state chhunga mipui rorelna tihbuai tuma inrawlh an awm niin a sawi a. Thalaite inhawr khawm chu politic khelh nan hmang lo tura ngenin an duh ang dikna an hmuh tur thu a sawi.