Dolphin thawk vangin China-ah maktaduai chuang insaseng

Typhoon Dolphin-in a nuai avangin Chinese thuneitute chuan Shanghai telin an ram khawchhak lama mi maktaduai chuang hmun himah an sawn.
Darkar khata km 150-a chak thli keng hian Pathianni tlai dar 5:30 (India-a tlai dar 3:00) khan Zhejiang province-a Yuhuan a lut hmasa a, a hnu darkar khat chuangah Wenzhou khawpui a lut leh bawk tih meteorology thuneituten an sawi.
Typhoon vang hian inkalpawhna a buai phah a, Shanghai bikah chauh pawh thlawhna 1,400 thlawk tur thulhtir an ni.
Chinese thuneitute hian a hmain Dolphin avang hian inralrinna sang ber an tichhuak a, Thawhtanni tukah erawh a chakna hlohvin tropical storm chauh a ni tawh.
Thuneitute chuan China lairil zawk a lut zel dawn a, Nilaini thleng hian ruah tam tak nen tui lian leh lei min a la thlen thei dawn tih an sawi.
Tual chhung sorkar chuan pawna chhuak tam lo turin mipui an chah a, Disneyland leh Legoland telin khualzinte tlawh thin hmunte an khar a, Shanghai-a Bund-a khawthlirna hmun tam tak pawh an khar.
Sorkar chanchinbu eng emaw zat chuan Wenling, Zhejiang-ah tuiin mipa naupang kum kaw mi a la a, a chin hriat a ni lo tih an tar lang a. Thuneitute erawh chuan engmah an la sawi lo.
Zhejiang hmun thenkhatah hian ruah mm 250 atanga 500 thleng sur thei turin an sawi lawk.
Zhejiang khawpui, Hangzhou-a chuan lirthei hunna hmuna parking fee lak thinte chu thlim ruah leh tui lian laka an lirthei him nana dahte tan an laksak lo.
Zhejiang province thova Wenzhou thuneitute chuan mi 9,00,000 vel hum himah sawnin emergency shelter 1,000 chuang an siam a, Taizhou-ah mi 3,90,000 chuang an sawn bawk.
Tuipui kama Fujian province-ah chuan tuipuia kal khapin passenger phurhna lawng kawngte khar niin tui kama in sak hnate pawh chawlhtir an ni.
Thli leh ruah thawk kaihhnawiha thu dik lo vawrh darh a nasa a, mi pahnih man an ni tih sorkar chanchinbu chuan a sawi.
Dolphin hian China a luh hmain Philippines, Taiwan hmar lam leh Japan-a Okinawa thliarkar te a lo nuai tawh bawk.