Kuhva tawlhruk ‘notified goods’ anga case siamsak turin larsap puihna ngen

Kuhva tawlhruk ‘notified goods’ anga
case siamsak turin larsap puihna ngen
Kuhva rah ro tawlhruk man a nihin, thubuai siamsakna chu a mantute tana harsatna siamtu a ni fo zawk thin avangin, ‘notified goods’ anga case siamsak an nih theihna atana hma laksak turin tualchhunga kuhva chingtu pawl chuan larsap an ngen.
Mizoram Kuhva Chingtu Pawl (MKCP) hruaitute chuan Thawhtanni khan larsap Gen. Vijay Kumar Singh (Retd) hmu in n pawl hmalakna leh foreign kuhva ro do dan turah memorandum an thehlut a. Larsap hian tha taka lo dawngsawngin, tih tur leh hmalak dan tur a lo sawipui a, thla khat hnua inhmu leh turin a sawm.
An thu thlen zingah, kuhva rah tawlhruk man a ni hian section 110 of Custom Act 1962 hmangin a tawlhtute hi thubuai siamsak niin, section 111 of Custom Act 1962 hmangin an thil tawlhruk hi hren sak a ni a. Heng section an book-naah hian bungraw tawlhruk a ni ngei tih finfiah hna chu a mantu enforcement agency tan hna tling leh harsatna thlentu a ni thin a; hemi kawnga awlsam zawka ‘book’ an nih theihnan Custom Division Aizawl hotu lam chuan Directorate of Revenue Intelligence Regional office Guwahati-ah ziakin, kuhva rah ro hi section 123 of Customs Act 1962 hmanga ‘notified goods’ anga chhiar a nih ve na turin an thlen tawh a. Hetiang bawk hian Mizoram sawrkar pawhin sawrkar laipuia Central Board of Indirect Taxes and Customs (CBIC) hnenah a lo thlen tawh tih an sawi a ni.
Heti chung hian, tun thlengin tihhlawhtlin a la ni loa, larsap chu CBIC leh sawrkar laipui Ministry of Finance-ah Myanmar atanga kuhva rah ro tawlhruk chu ‘Section 123 of the Customs Act 1962’ ah hian thun ve tura hma lakpui turin MKCP hian an ngen a. He dan hnuaia thubuai siam a nih chuan a tawlhtu zawk hian a thil tawlhruk finfiah hi a chungah a tla ve thung tawh dawn a, hei hian state Police bakah Customs leh Assam Rifles tan pawh dan loa tawlhruk tihtawp tuma an beihna kawngah a pui dawn tih an sawi a ni.
Tunhnai kum 5 chhung, kumin thlengin, Mizoram Police ringawtin kuhva rah tawlhruk bag 65000 chuang manin, an hralhna anga chhut chuan cheng vaibelchhe 62.52 a ni pha tih an sawi a. Hetah hian Assam Rifles leh Customs Department-in an man a tel lo zawk tih sawiin, hetiang khawpa kuhva tawlhruk a rawn luh nasat avang hian tualchhunga kuhva chingtute tan harsatna hrang hrang siamin, a man hial a tlakhniam phah a; chumi nghawngah chuan kuhva tawlhruk leh a phurhna lirthei an man hal thlengin kuhva chingtu thenkhat thinrimna a sosang tih larsap hnenah hian an sawi.
Tunhnaia Mizoram sawrkar leh central agency dang hmalakna avangin kuhva tawlhruk hi a ziaawm ta hle a, tualchhunga kuhva chingtute pawhin kuhva hralhna an senglut tha ta hle tih an sawi a. Tun dinhmunah Mizorama hectare 30000 velah kuhva hi chin niin, 2025- 2025 chhung khan kuhva rah an thar hi quintal nuai hnih vel a ni a, chhungkaw sang chuang, a bikin Mamit leh Kolasib district-a chengten an chhawr tih an sawi a ni.