Enkawl that loh Lalsavunga Park contractor cancel turin an phut

Enkawl that loh Lalsavunga Park
contractor cancel turin an phut
Hlimen Veng huamchhunga awm Lalsavunga Park chu sawrkarin a enkawl tura a thlan contractor-in inremna thu an thlun angin a enkawl loa, tunhnaiah phei chuan enkawl that loh vangin nunna atan pawha him lo a awm nual tih Hlimen khawtlang hruaitute chuan an sawi a. Contractor nena inremna hi August thla chhunga cancel a nih loh chuan tiamchin awm loa dan an tum tih an sawi.
Hlimen Local Council leh All NGO (YMA, MHIP, MUP) thuchhuak chuan, an veng chhunga Directorate of Local Administration, Rural Development & Administration department hnuaia awm Lalsavunga Park enkawl a nih danah duhkhawp lohna tam tak an nei a. Department leh contractor Oasis Lalruattluanga ten a enkawl dan tura deed of agreement an siam anga enkawl a ni lo tih an sawi.
Contractor hian kum thum a enkawl chhungin kumtin department hnena sum a chhunluh tur, cheng nuai 20 bakah kumtin 6.5% compound interest pung tura tih chu, RTI chhanna an dawn angin kum khatna leh kum thumnaah a pe kim loa, hei hi agreement bawhchhiatna a nih bakah vawikhat chauh pawh a pe kim lo a nih chuan cancel sak theih tih agreement-a ziah a ni a, a kum 3-na (August 2025 – August 2026) ah hian Rs. 5,67,122 chauh a chhunglut chungin, department hian hmalakna a nei lo tih an sawi
Department leh contractor deed of agreement point no.5 leh 9 a inziah angin, Park vawnfai kawngah leh department bungrua (property) tha taka enkawl bakah Park chhung kumtin vawihnih sam fai, Park infrastructure (building, rest house, cabin, retaining wall, gate) kum khat dana rawng hnawih leh a tul anga siamthat tura tih a nih laiin, vawnfai leh cheithat mumal a ni lo a. He agreement-ah contract cancel thlenga action lak theih, tih ziak a nih angin, department-in hma a la lo tih a sawi bawk.
Deed of agreement point no.11-naah, Park bungrua engpawh contract hun chhunga chhia a awm a nih chuan, contractor hian department ruahman anga siamtha thin tura tih a nih laiin, lei (bridge) leh construction work dang hi enkawl mumal a ni lo a, hei hi Park hmangtute tan a him loh bakah nunna hial chan theihna thil a ni tih an sawi.
Deed of agreement point no.15-naah, agreement chang engemaw ber pawh bawhchhiat a nih chuan, LAD-in contractor hi insawifiah turin a ti anga, a insawifiahna pawm a nih loh chuan tihtawp theih, tih a ni a; agreement-a chang hrang hrang bawhchhiat a ni chung pawhin, department atangin engmah hma la a awm lo tih a sawi a ni.
‘Heng point hrang hrang bawchhiatna a nih bakah Lalsavunga Park hi ram chhung leh ram pawn atanga tourist tam takin an tlawh nasat tak a ni a. Mizoram hmel lanna pakhat a ni. Hetianga rawih lam pan zawng leh enkawl that ni loa a awm hi Hlimen khawtlang chuan pawi kan ti a, Lalsavunga Park enkawltu hi department hian August 2026 ralhma in a contract hi a cancel lo a nih chuan, Hlimen Local Council leh All NGOs chuan tlawh theih loh turin tiamchin awm loin kan dang dawn,’ thuchhuah chuan a ti.