Degree ngawtin hlawhtlinna a keng lo

Zirlaite chu degree an hlawhchhuah ringawtin hlawhtlinna a keng tel nghal loa, zir ngai zir belh zel a, insiamrem thiam leh ngaihtuahna thar hman thiam a tul zawk tih Home minister K Sapdanga chuan a sawi.
Government Champhai College chuan Thawhlehni khan Chamdel Kut hman pahin an college-a lur tharte lawman an hmang a. Hmanpuitu Home minister hian, thalaite khawvel inthlakdang lam chak takah digital technology, artificial intelligence, climate change nen cheng dunin, heng hian eng kawngah pawh nghawng a nei thuk hle tawh tih a sawi.
Thalaiten chona an hmachhawn mek, ruihhlo hmansual, cybercrime, online-a inbumna, thuthang dik lo lengvel leh social media khawvel hrisel lo takin an tun hun leh hmalam hun a tibuai thin a, zirna chuan rilru fing leh fim bakah takna nun nen khua leh tui tha ni tura a cherhchhuah a tul hle tih a sawi a ni.
“Remchanna nghak loin, a siamtu ni zawk ula, ngaihtuahna thar leh tih dan tha zawk ruahman a, tunlai thiamna thiam takin hmang tangkai ula; khawvel zau zawka tal lut chungin Mizo tawng, hnam zia leh nunphung vawng reng ang che u,” K Sapdanga hian a ti.
Chamdel Kutah hian college zirlaite atangin hnam lam leh zai leh thiamthil hrang hrang entir a ni a. Govt Champhai College hi 1971 August 6-a din niin, tunah hian Arts stream, Science stream, Computer Science leh Commerce zirna a awm a ni.