Kuki-ten NH an dan titawp, Naga khaw in ruk halna thleng zui

Kuki pawl chuan lehlam chetna tihlet nana Ukhrul-a Manipur leh an thenawm, Nagaland inkalpawhna, National Highway (NH) 202 an dan chu Thawhlehnia sorkar aiawhte nen an inbiak hnuah an titawp a. A hnu lawkah Naga khuaah in pakua hal zui a ni.
Kuki Civil Society Organisation-a Working Committee chuan kawngpui an dan hi Thawhlehni tlai dar 4.30 atang khan Home Minister Govindas Konthoujam leh rorel lai, BJP MLA Thokchom Radheshyam te nen Ukhrul-a an inbiak hnuah an hawng tih an sawi a. Committee hian sorkar aiawhte nen hian inremna an ziak a, hemi hnuaiah hian NH 202-ah hian zalen leh him taka veivah a nih tur thu leh dan leh emaw, kal vel tibuai thei emaw kawngdung tluana ven a nih tur thu a inziak.
Kuki pawl hian Naga pawlin July 27 atanga Manipur-a district inkalpawhna national highway zawng zawng an dan tihlet nan August 5 atangin kawngpui hi an dang ve a ni.
Naga-te hian May 13-a Kuki nia an sawiten an hnampui ru bova puha a hnu, June 10-a an ruang paruk chhe tawh tak an hmuh atang khan a titu man chhuaha an awm theih nan leh lungawi loh lantir nan kawngpui hi an dang a ni.
Naga leh Kuki-Zo inkarah hian May 13-a inlambunna pahnih, kohhran hruaitu pathum tela mi pali thihna a thlen atangin inepna boruak a awm tan.
Hemi ni vek hian Kuki-Zo leh Naga pawlte chuan mi 48 an inmansak tawn a. May 15 khan lehlam lehlam hian an mi man 14 ve ve an chhuah a, a bak Kuki-Zo 14 chu Naga-te hian June 9-ah an chhuah leh a. A tukah chian Naga-te hian an hnampui bo nia an hriat ruang chhe tawh tak paruk an chhar ta a ni.
Manipur-a chi leh chi inkara buaina hi May, 2023-a Meitei leh Kuki inkara chhuak tan niin tunah chuan hnam hrang hrang a kang kai tawh a. State chhunga Meitei leh Kuki-Zo hian an awmna chin ve ve chu hnam dang luh theih lohna turin an khar ve ve a ni.
Hetianga sorkar leh Kuki ten inremna chi khat siama kawng an hawn hnu lawk hian Kangpokpi district, Tokpa Liangmai khuaah in pakua vel chu Thawhlehni zan khan mi tu tih hriat loh ralthuam kengten an hal tih thuneituten Nilaini khan an sawi.
Thuneitute chuan Thawhlehni zan dar 9.30 vel khan Tumnoupokpi Thangal khaw bula Tokpa Liangmai Naga khuaah a thleng tih an sawi a, tual chhung mite chuan venhim hna thawktuten engtin mah chet an lak loh thu an sawi.
United Naga Council (UNC)-in tiam chin nei lova kawngpui an dah chhen let nana Kuki pawlin an dan let ve an hlih thu an puan hnu lawka thleng a ni.
Tokpa Naga Village Authority (TNVA)-in thuchhuah siamin, “Sipai uniform ha, automatic ralthuam changkang tak tak keng pawl khat chu Tokpa Naga khuaah an lut a, pawikhawihna thlentute hian tumah thliar hranna nei lovin silai an hmet puak nia sawi a ni a, chenna in pakua, biak in pakhat leh thil dang hal ralin a cheng chhungkua eng emaw zat baihvaiin an awm phah,” an ti.
TNVA chuan he thil thlenna bula awm, Kalaphar High School-a Central Reserve Police Force (CRPF) leh Kangpokpi police hnenah an thlen nawn fo chungin an chhang lo niin an sawi bawk.
Khaw thuneitute chuan rang taka chhui chian turin FIR an thehlut a, mawhphurtute thubuai siam te, khaw mipuite himna tura venhim hna thawktu tha tawk dah vata harsatna tawk chhungkuate chhawmdawlna, an intun din lehna tur leh zangnadawmna pek an phut bawk.
Liangmai Naga Council, Manipur chuan ‘Kuki Narco-terrorist-te’ chu he thil thlengah hian mawhphurtuah an puh bawk.
Council chuan sorkar leh a kaihhnawih venhimna kawnga thuneitute chu hmanhmawh taka che turin a ngen a, tumah thliar lova danpuiin mawhphurhna a pek ang ngeia hma la turin a ngen.
A tam zawk Hindu, Meitei-te hi Imphal phaizawlah an cheng ber a. Kuki-te hi Kristian ni tlangpuiin tlangramah an cheng thung a. State sorkar chuan hnam hnihte chenna inrina lai bawrah buaina chhuah mai hlauhawmna hmun awm tawh lo ti mah se boruak erawh a la tang reng.
Kum khat dawn President’s Rule-a an awm hnuah February khan mipui thlan sorkar din thar leh a ni a. Hnam lian tak tak pathum atangin sorkarah hian chanvo an nei vek a, tharum thawhna thleng tam lutuk tawh lo mah se mi 260 chuang thi awm tawhin mi 60,000 vel in leh lo tlanchhiatsan an awm a ni.