Kuminah sawhthing qtl nuai 2 hralh tawh

Kuminah sawhthing qtl nuai 2 hralh tawh
Kuminah sawrkarin sawhthing quintal nuai hnih chuang a hralh tawh a, support price cheng nuai sang nga chuang pek a ni tawh Mizoram Agriculture Marketing Board chairman PC Vanlalruata chuan a sawi.
Mamit-a Independence Day lawm a hmanpuinaah Agriculture & Farmers’ Welfare minister PC Vanlalruata chuan, Mizoram sawrkarin kuthnathawktute hmakhua ngaipawimawhin state flagship programme – Bana Kaih Policy hnuaiah sawhthing lei a kalpui chho leh mup mup tawh a. Nikum khan sawhthing leina atan sawrkarin cheng vaibelchhe 138 a seng tawh a; kuminah pawh an hriat theih chinah sawhthing hi primary collection centre leh secondary collection centre hrang hrang kaltlangin quintal 2,00,481 hralh chhuah a ni tawh a, support price pawh Rs. 51,13,17,737 pek a ni tawh tih a sawi a ni.
An department chuan Mizorama a vawikhatna atan Price Support Scheme (PSS) hnuaiah behliang, chhawhchhi leh nihawi lei turin a inpuahchah mek a. Central-a cooperative federation lian NAFED-in a rawn lei dawn tih a sawi.
Irrigation & Water Resources minister ni bawk PC Vanlalruata chuan, loneituten an kham khawp tui an hmuh theihnan leh an thlai thar tipung turin hma an la a. Irrigation project hi eco-tourism nen thlunzawm, loneitute eizawnna tih pun, sum lakluh tihsan leh natural resource kan neih humhalh chu department thil tum ber a ni tih a sawi.
Tunah hian Mizoram hmun hrang hrangah surface irrigation project 18 an enkawl mek bakah groundwater irrigation project 4 an kalpui mek tih sawiin, “Kan tuihna siamthat a, humhalhna atan Modernization of Command Area Development project kan kalpui a. Mizorama lui tui san zawng, ruahsur tam dan, groundwater level thlenga data mumal tak neih theihnan Mizoram State Water Informatics Centre din a ni a. Mizoram hmun hrang hrangah RTDAS Station 18 dah niin, heta tang hian engtik lai pawhin data a thlir reng theih,” a ti. Heng bakah hian hmun hrang hrangah minor irrigation project an kalpui mek tih a sawi bawk.
Cooperation minister PC Vanlalruata hian, district tinah Multipurpose Primary Agricultural Credit Society (MPACS) tam zawk din tumin hma an la a, MPACS hi computer leh tul dang mamawh hmanga thuam zel niin, MPACS din tawhna khuaah chuan kuthnathawktuten an chhawr tangkai em em zel tih a sawi.
MPACS bakah hian Multipurpose Dairy Cooperative leh Multipurpose Fishery Cooperative din an tum a, bawng vulh leh sangha khawi lama tui tan a tangkai hle dawn a, Vety leh Fisheries department nen tanghoin hma an la mek tih a sawi a ni.
World’s Largest Grain Storage Plan in Cooperative Sector scheme hnuaiah Mamit district-ah kudam sa turin ruahman a ni a. Hemi chungchangah hian district cooperative officer leh Food Corporation of India-in joint inspection an nei tawh a, report an thehlut tawh tih a sawi.