Chawngte-ah SDO hoin I Day hmang

India ram hmun dang rualin Lawngtlai district-a Chawngte-ah pawh sub divisional officer (Civil) hoin August 15 khan India Independence Day vawi 80-na hman a ni.
SDO(C) Lalnunpuia Renthlei chuan, India zalenna atana tha thawhtute zawng zawng zahna chibai an buk thar tih a sawi a. Hemi rual hian Chawngte sub division chhunga sawrkar hmalakna leh hnathawh a tarlang.
A sawi zingah, VB-G RAM G chu kumin July 1 atang khan hman tan a ni a, Chawngte RD Block huamchhungah job card 17643 a awm mek a. Mizoram State Livelihoods Mission kaltlangin self help group 902 leh village organisation 88 a awm.
Police department hnuaia dan leh thupek kenkawh kawnga hmalakna leh Health & Family Welfare department hnuaia mipui hriselna atana hmalakna a sawi bawk.
Governor’s Rule hnuaia hun engemawchen a awm hnua Chakma Autonomous District Council (CADC) a sawrkar thar a pian thu sawiin, sawrkar tha, ngelnghet leh chak tak, mipui that tlanna atan leh hmasawnna atana thawk thei a nih ngei a duhsak tih a sawi a ni.
Chawngte-a Independence Day lawmnaah hian march past-ah NCC contingents 4 leh school contingents 17 bakah band party pakhat ten hnam puanzar chibai an buk chu khuallian hian a chhanglet a ni.
Hemi hnu hian SDO(C) hian Chawngte Community Health Centre tlawhin Independence Day pual hian damlo awmte hnenah thilpek hlanin a kan a ni.