Jharkhand zirlaiten CM hual an tum, bâng turin an phut

On Aug 17, 2026 0 0

Jharkhand Public Service Commission (JPSC) examination-a thil tih dan dik lo a awm nia puhtu thalai hna zawng laite chuan bâng tura an phut, Chief Minister Hemant Soren-a chu August 20-ah a chenna inah kal chilh an tum.
JPSC-JSSC Reforms Manch an tih thupuangtu, Piyush Singh chuan thil dik lo awmte ‘hai chhuah vek’ an duh tih a sawi a, “A vawi khat nan thil phut kan nei a. Heng dik lo tih thin hi hai chhuaha siam that vek kan duh,” tiin a sawi.
Zirlai lungawi lote hian Inrinni khan examination-a thil dik lo awm an duh loh an lantir ni 22-naah ‘Tiranga Yatra’ tia hming vuahin an thawk chhuak leh.
“Tun thlengin sorkar lakah hian Gandhi-a chet dan ang zelin kan la nawr a; mahse, kan thil phutte chu bengngawng hnena thlen ang chauh a ni a. Vawiin hian August 20-ah chief minister chenna ina kala hual chep kan tum tih kan puang a. Kan duh chu JSSC -CGL exam cancel leh CBI chhui a ni a. An ti lo a nih chuan chief minister chenna in panin kawng kan zawh ang a, kan thil phut kan hlawh chhuah hma chu kan awm dawn a ni,” tiin Singh-a chuan thuthar lakhawmtute hnenah a sawi.
Zirlai lungawi lote hian Congress chu JMM kaihhruai tangrual sorkar an thlawpna titawp turin an phut bawk.
JPSC-JSSC Reforms Manch hruaitu, Ravindra Paswan-a chuan, “August 20-ah chief minister chenna inah kan che dawn a. A bân phutna kan lantir ang a, JMM leh Congress hian politic khelh nan min hmang a. Congress hruaitu, Rahul Gandhi-a hi chief minister-in kan thusawi min ngaihthlaksak lo a nih chuan JMM kaihhruai tangrual a thlawpna atangin inhnukdawk turin kan phut bawk,” a tia. “Rahul Gandhi-a hian phone-in min be tawh a; mahse, hetiang mai mai hi awmzia a awm tak tak lo,” a ti.
Zirlai lungawi lote hian JPSC exam buatsaiha thil dik lo awmte chu CBI emaw, Jharkhand pawn lam mi judge kaihhruaia chhui emaw an phut a ni.
Jharkhand-a thalaite lungawi lohna hi JPSC-in April thlaa preliminary civil service exam a buatsaih dan atangin a ni a. July thlaa result a chhuah khan a beitu thenkhatin social media-a chhanna lehkha nia sawi an thehdarhah a tling zinga thenkhatin beisei phak bakin zawhna an chhang tlem tih a lang a. He thil hian result chu phuahchawp, duhsak bik tihtlin ni theia ngaihna a siam ta a ni.
July 25 atanga state khawpui, Ranchi-a zirlai rual punkhawmnaah thenkhatin chaw an nghei a, state assembly panin kawng an zawh tawh a, tunah hian chief minister chenna lam an hawi leh dawn ta a ni.