Golden Boot inchuh turte

Khawvela tualchhung League ropui ber leh sum tamna ber English Premier League (EPL) season thar chu August 21,Zirtawp zan hian khelh tan a ni dawn. EPL 2026-27 a Golden Boot dawng thei tura rinkai zual palite kan tarlang ang.
Erling Haaland
EPL ah chuan top-scorer tur sawi rual rualin Erling Haaland hming a langsar nghal lurh. Haaland hi EPL top scorer ni tura rinkai ber a ni satliah lova, tuin nge en zo ve deuh ber ang tih chu zawhna awm lian zawk chu a ni.
Goal a thun pawp pawp thin vanga, ‘inelna hrang hrang a tiho zo’ an tih fiam thin Haaland hian season li chhungin EPL a hmachhawn tawh a. Season li chhung hian vawi thum ngawt top-scorer a ni der tawh. 2022 khan Club hausa Manchester City in an la lut. Mi tam tak chuan forward tan chet harsatna thin EPL-ah meuh chuan Haaland meuh pawh hi eng ruai a nih an ring bik lo. Mah se, EPL a hmachhawn ta a, goal a thun nghal pawp pawp a, goal a thun theih em vangin EPL a thi ho zo te an ti leh lawi.
EPL-a a season hmasa berah Haaland hian goal 36 a thun nghal ringawt a, EPL-ah season khata goal thun tam ber record thar a siam nghal der. 2023-24 leh 2025-26-ahte top-scorer a ni zui leh bawk. EPL-ah hian vawi 111 chauh khelin goal 100 a thun tling a, EPL-ah goal 100 thun tling rang ber a ni. Season tharah hian top-scorer a ni leh a nih chuan EPL a top-scorer ni ngun Thiery Henry leh Mohamed Salah te record a nih rual ang.
EPL 2026-27 a top-scorer tur inrinsiaknaah Haaland hian rin a kai fal hle.
Alexander Isak
Newcastle United tan a khelh laiin Alexander Isak hi EPL a forward hot ber pawl a ni a, goal a thun thei hle. 2024-25 season-ah phei kha chuan Newcastle tan hian EPL-ah goal 23 lai a thun hial nghe nghe a ni. Newcastke tan a khelh that theih em vangin club lian leh ropui zawk Liverpool in season liam ta khan £125m zet sengin an la lut. Beiseina sang tak nen la lut bawk mah se a club tharah a insiam rem mai thei lo va, hliamin a tibuai reng bawk nen goal a thun tam thei lo. Liverpool tan hian inelna hrang hrangah vawi 22 chauh a khel a, goal li a thun. Season tharah erawh chuan Reds tan ngampa zawkin a inlan thei dawn a, goal thun lamah Haaland elpui lian ber ni tura ngaih a ni.
Viktor Gyokeres
Arsenal in season khata goal 20 thun thei tur an mamawh a, Viktor Gyokeres an la lut. Gyokeres hian EPL-a a season hmasa berah vawi 21 khelin goal 14 a thun a, Gunners tan hian inelna hrang hrangah goal 21 a thun tling. Season khata goal 20 chin thun tling thei tur an mamawh vanga an lak luh Gyokeres hian goal 21 a thun a, kum 22 zet hnuah EPL champion an ni ta chiah bawk. Zet lo tut angin lang bawk mah se Gyokeres hian season tharah goal tam zawk a thun a rinawm.
Joao Pedro
Pedro hian Brighton atangin Chelsea a zawm a, season liam ta khan EPL-ah goal 15 a thun tling hman der. Chelsea ah hian stiker angin a khel tam leh zual a, hei vang hian season tharah goal tam zawk a thun ngei tura ngaih a ni.