EPL 2026-27 kan nghakchhuak ta e

Football ngainatuten kan nghahhlelh em em English Premier League season thar chu kan nghakchhuak ta a. Zanin zanlai dar 12:30 atangin EPL 2026-27 season khelh tan a ni dawn. EPL seaon thara inkhel hmasa berah chanmpion lai Arsenal an inlan nghal dawn a, Gunners hian Emirates Stadium-ah kai thar Conventry City an mikhual dawn.
Champion leh champion
EPL 2026-27 a inkhel hmasa berah season liam taa champion leh champion an inhmachhawn nghal dawn. Arsenal hi hun rei tak ‘Teuhsenal’ an nih hnuin EPL-ah an champion a. Kum 22 zet hnuah a vawi khat nan EPL trophy an la. ‘Next season’ an thlir fo hnuah an champion kum an nghakchhuak a, 2026-27 season-ah pawh champion tura rinkai ber an ni chiang leh viau bawk. Championship lama champion Coventry City lakah EPL champion zia an chhuah dawn a, an mualah chak ngei tura ngaih a ni.
EPL champion Arsenal laka fiahna hautak hmachhawn tur Championship champion Coventry City hian Chelsea midfielder hlui Frank Lampard chu an manager atan an ruai a, an tifuh hle. Season liam ta khan point 11 zeta sang fal chungin Championship-ah an champion a, EPL khel turin an tling. Kum 25 zet hnuah khawvela tualchhung league lian leh ropui ber English Premier League (EPL) an hmachhawn leh dawn a, phurna namen lo tak nen an inlan dawn. EPL champion Arsenal lakah engtiang chiaha tha nge an ni tih fiah an tum dawn a, Arsenal barakhaihin inlehthalna lian thlentir ngei an tum dawn.
Inbuatsaihna
Arsenal muala lenglut tur Coventry City hian season thar atana inbuatsaihna friendly match-ah result an nei tha lo. Portugal-a an hmachhawn Portimonense chu si hnih faiin an hneh lo ringawt a. An match hnihnaah championship club West Bromwich Albion nen 1-1 in an inhnehtawk zui leh bawk. Hnehna an chan theih loh zawn hnuin a tawp an khar tha thung a, AS Monano chu 2-0 a hnehin pre-season an khar. Monaco laka an chakna chan ang kha Arsenal lakah chan an tum leh dawn a ni a, a khirh ve tawh det thung dawn niin a lang.
EPL Champion Arsenal pawhin Pre-season-ah result an nei tha bik hran lo va, inkhel vawi nga an hmachhawnah vawi hnih chiah an chak. Friendly match ah Spanish club Girona an hmachhawn hmasa ber a, 4-1 in hnehna an chang nghal. Girona lakah mit la taka an inlan hnuin Real Betis lakah 3-1 in a tlawm a. Bundesliga club lian Borussia Dortmund lakah 3-2 in an tlawm zui leh bawk. Hemi hnu hian an midfielder hlui Fabregas enkawl Como en inkhelin 1-1 in an inhnehtawk zui leh. Result nei chhe zawn bawk mah se a tawp erawh an khar tha viau thung a. FA Community Shield-a an khingpui Manchester City chu 3-0 ngawtin an hneh a, trophy nen season thar bul an tan.
3-0 ngawta Manchester City an sawp thei hian inrintawkna sang a pe a. Mikel Arteta enkawl Arsenal hian EPL-ah champion nawn leh turin rin an kai phah hle nghe nghe a ni.
Arsenal hian season tharah tha zual zawka inlan tumin an squad an thuamchak a, midfielder tha tak Bruno Guimaraes an la lut. Muallaiah Declan Rice, Guimaraes leh Martin Odegaard te an inkawp thei dawn a. Mikel Merino, Martin Zubimendi leh Eze te an la nei cheu bawk a, Gunners hian midfielder an nei tha hle. Tlahma player Leandro Trossard hralhchhuak bawk mah se khingpuite laka huangtau thei zet mai Christo Tzolis an la lut thung. Arsenal tlarhmate hi an hriam tha tawk viau. Striker-ah Viktor Gyokeres leh Kai Havertz te duh thlan tur an nei a. Bukayo Saka leh Noni Madueke te hmun inchuh tur pawh hi a hmuhnawm dawn viau bawk.
Arsenal defender pawimawh William Saliba chu hliam vangin a chawl mek a, Coventry City lakah bul a tan thei dawn lo. Saliba a chawlh deuh rih dawn vangin Gunners hian England defender Ezri Konsa chu Aston Villa atangin an la lut dawn. Konsa an lak luh dawn vangin Gunners hi an pan rihna lai pawh a chhah leh ta viau lawi.
Kum 25 zet hnuah EPL a inlan leh tur Coventry City pawhin an phak tawk angin an squad an thuakchak ve mek bawk. Player hrawl leh langsar la lut rih lo mah se an mamawh ang player erawh an dap khawp thiam viau thung a, championship an khelh lai ngawt ai chuan an squad a chhahin an tha viau tawh a ni.
Tute nge bul tan ang?
Champion lai Arsenal tan EPL-ah a zawna vawi thum ngawt Golden Glove dawng thei David Raya khawih chet thiang loh tluk a ni a, Si nghak Raya hian bul a tan ngei tura ngaih a ni. Defence line-ah Ricardo Calafiori, Gabriel, Cristhian Mosquera leh Ben White ten bul an tan rin a ni a. Muallaiah Declan Rice, Martin Odegaard leh Bruno Guimaraes te inkawp in, tlarhmaah Tzolis, Viktor Gyokeres leh Bukayo Saka te an inkawp rin a ni.
Coventry City manager Frank Lampard pawhin 4-3-3 formationtho hmangin; si nghakah Carl Rushworth a hmang ang a. Tlarhnung lamah; Milan van Ewijk, Bobby Thomas, Aurele Amenda leh Jake Dasilva te dahin. muallaiah Frank Onyeka, Caleb Yirenkyi leh, Liam Grimes te an inkawp ang a. Tlarhmaah Loum Tchaouna Ellis Simms leh Solomon Thomas-Asante te a rem a rinawm.
Tunge chak ang?
Arsenal leh Coventry City te inkhel turah hian result ringlawk hrang hrangte chuan Arsenal chak ngei turah an ngai hlawm. Arsenal tan point thum hmuh theihna hun remchang ni tura ngaih a ni a. An mualah point thum an hmu zo lo a nih chuan an tan bul tanna tha lo ni ang a, Coventry tan result tha tak a ni thung ang.