Union minister zuitu zingah Mizopa
Sawrkar laipuia Union minister Piyush Goyal zuiin Japan-ah Mizoram atangin Mission Foundation Movement hotu Lalramchuanzela a tel.
Union Commerce & Industry minister hi August 23- 30 chhung khan Japan khawpui pathum – Tokyo, Osaka leh Nagoya-ah thuk zawka India leh Japan sawrkar insumdawn tawn theihna kawng zawngin Indian sumdawng leh investors 200 chuang hruaiin a zin a. India sawrkarin ram pawna investment ti tura team a la ngah ber tum nia sawi niin, India rama sumdawnna kawnga ruahmanna leh policy duang thintu pawl pathum – Confederation of Indian Industry (CII), Associated Chambers of Commerce & Industry of India leh Federation of Indian Chambers of Commerce & Industry member-te an kal.
Heng zingah hian CII National Executive Committee member ni lai, MFM executive director Lalramchuanzela a tel a. Tun dinhmunah Japan hi India-in investment ti tura a duh ber ram niin, Japanese company tam takin India ramah bu an rawn khuar nasa tawh hle a, ramdanga a factory pawh India-a suamlut turin Japan company thenkhat chuan hma an la mek tih sawi a ni. India rama state tam takin investment ti turin delegation lian tak tak an tir reng thin bawk.
Japan chuan Mizoram leh hmarchhak state thenkhat chu Japanese population hniam lam pan zelah thiamna bik nei hna thawk tur, a bikin caregiver, construction, driver, hotel khualchhawn, food manufacturing leh agriculture lam enkawltu atan a mamawh hle a. Tun atanga kum 5 chhungin India mi 50000 chawkluh an tum tih Japan Prime minister chuan a lo sawi tawh tih sawi a ni.
Mission Foundation Movement hian Japan-ah Mizo thalai 30 chuang hnathawk turin a lo thawn lut tawh a, Japan tawng zirna a kalpui mek bawk. Japan sawrkar hian Mizoramah cheng vaibelchhe 700 man State Super Specialty Cancer and Research Centre chu Cancer Hospital Zemabawkah a sa mek a, NH-54 Highway Aizawl- Tuipang a lai mek a, ‘Sustainable Agriculture and Irrigation Development in Mizoram’ tih leh Sports & Youth Services department-ah thawhho tur zirchian a nei mek tih sawi a ni bawk.