District pahnih inpawhna tha siam tumin Festival nei dawn

Mizoram leh Assam state-a cheng, ramri hrul amite inpawhna tha zawk siam tumin a inri ber district pahnih chuan Vairengte-a Inter-State Border Festival buatsaih an tum.
Kolasib district bawrhsap H Dolianbuaia leh Cachar district bawrhsap Rahul Kumar Gupta chu Thawhlehni khan Cachar bawrhsap pisa-ah an inhmu a. Kumin October 30-a Vairengte-a Inter-State Border Festival neih tur chungchang leh hmasawnna atana thawhho dan tur an sawi dun.
Bawrhsap pahnih hian Vairengte-a Festival buatsaih tur hi hlawhtling taka hman a nih theihnan theihtawpa thawhho an tiam a. He hunah hian infiamna hrang hrang – futsal, badminton, volleyball leh table tennis a intihsiak bakah hnam lam chi hrang hrang entir a ni anga, ATMA leh MZSRLM atangin stall hawn a ni ang.
Thutkhawmah hian ramri hrula cheng mipuite ralmuang leh thlamuang taka an awm theihna atan, ruihhlo do kawnga tha thlah loa thawhho dan leh hmasawnna kawng hrang hranga district pahnih thawhho dan tur an sawi dun a. Bawrhsap pahnih inhmuh rual hian Superintendent of Police pahnih – Lalrinpuia Varte (Kolasib) leh Partha Protim Das (Cachar) pawh inhmu ve nghalin, an district huamchhunga dan kenkawhna leh ruihhlo tawlhruk do kawnga thawhho dan tur an sawidun bawk.
Kolasib bawrhsap hi a kaihhnawih district official-ten an tawiawm a ni.