Gas pipeline phum mek minister hoin enfiah tum

Indradhanush Gas Grid Limited (IGGL) in Tripura Panisagar atanga Sihhmui Mizoram thlenga natural gas kalna tur pipeline phum chungchanga hma an lak tawh chin leh harsatna awm chu Thawhtanni khan Supply minister B Lalchhanzova kaihhruaiin sawiho a ni.
FCS&CA minister chuan, India gas chawkluhna ram an indo avangin eirawngbawlna gas-ah kan phang a. Gas pipeline atanga natural gas hmang state-te chuan harsatna an tawk lo, tiin, Mizoramah pawh March 2027-ah chuan hei hi hmang ve hman tura hma lak a ni a; Mamit district Tuidam leh Darlak inkar km 1.5, tuna IGGL-in hna a thawh mekna pipeline phumna turah harsatna an tawk tih IGGL hotuten an sawi tih a sawi a ni.
Kumin October chhunga IGGL, FCS&CA department, PWD leh DC Mamit nen a hmunah ama hoa en nise, tiin, department hotute chu ruahmanna siam turin a chah nghal.
IGGL gas pipeline chu a hunah tha taka zawh a nih theihnan Mizoram sawrkarin theihtawp a chhuah pui zel dawn a. FCS&CA bakah Commerce & Industries, Geology & Mining department pawh a inhawng a; IGGL leh Tripura Natural Gas Company Limited lam ram mamawh a rang thei anga land acquisition tih fel sak zelin, hmalakna dang pawh an umzui sak zel tih a sawi a ni.
FCS&CA secretary Ravi Dadhich chuan, contractor-in chak zawka hna a thawh theihnan IGGL hotute hnenah Mizorama hnathawh chu thil awlsam tak a ni lo tih hna tan hmaa an hriat sa a nih avangin, hnathawh muannan chhuanlam a tling lo tih a sawi a. India sawrkar project pawimawh, hunbi nei a nih angin tan mar a tul tih a hrilh.
Thutkhawmah hian PWD leh Aizawl DC aiawh an tel a. Inbiak hmuh theihna hmangin DC Mamit leh IGGL hotuten an zawm bawk.