Hindi bawk…

Nimina Hindi Diwas Day hmannaah education minister Dr. Vanlalthlana chuan Mizoram Education Reform Committee-in Hindi tawng zir a pawimawhzia hriain ‘thla khata nikhat hindi tawng hman ni’ neih rawtna an siam tih sawiin, hei hi bawhzuiin guide book-te pek chhuah a ni a, hmalak mek zel a ni, a ti.
Hindi thiam pawimwhzia hi chuan sawi a hlawhna a rei ta hle a, mahse ‘a pawimawh’ tih thu sawichhuah bak hmalak zuina tak tak a awm ngai lo. Kan sawi thin a, Mizoram Larsap apiang deuhthawin Hindi tawng lama Mizote kan pachhiatzia an rawn hre deuh zel a; Hindi tawng thiam turin thahnemngai takin Mizote min rawn fuih thin a nih kha. Mizoten kawng hrang hranga talent kan neih thatzia pawh an hmu a, chutih laiin kan chak lohna lai, kan ‘weak point’ chu ‘tawng’ a ni tih pawh an hmu nghal.
Kan Larsap te khan Mizoram hmun hrang hrang an tlawh thin a, chuta mipui hmaa an thusawi atanga hriat theih chu: Mizote hi talent nei tha tak an nih laiin, tawng lama harsatna an neih hi an inphochhuah (exposure) that theih lohna chhan (factor) lianpui mai a ni a, tun ai hian tawng lamah hian tan han la nasa leh deuh se chuan, hma an sawn zawt zawtin a rinawm, tiin.
Mizote hi state dangte nen khaikhin ralah chuan, tawng chi hrang thiam tam lo ber kan ni awm e. Hindi hi kan awmna India ram tawngpui ber a ni a, thiam hrim hrim hi chu kan tih makmawh a ni a, chumi piah lamah, eizawnna kawngah te, zin veivahna kawngah te leh hna dang dang thawhna kawngah, Hindi thiam leh thiam lo kar chu a hla hle a nih hi.
Tuna Mizoram Education Reform Committee rawtna tihpuitlin tum mek, ‘thla khata Hindi tawng hman ni’ siam hi thil tha tak a ni ngei ang; chutih rualin, tihluihna anga discipline khauh tak hnuaia kalpui loh a pawimawhin a rinawm. Zirlai ten nuam ti taka an zir theihna tur friendly atmosphere siam thiam a pawimawh dawn a, barhluih lutuk chuan Hindi huatna a hring chhuak hlauh ang tih a hlauhawm thei a ni. Tlangnel taka Hindi tawng an hman theihna tur boruak siam dan tur te, goal fel tak neia kal te a pawimawh dawn hle a ni.
Zirna in pawn lamah pawh, mipui a mimir pawh hian tawng hi kan ngaihpawimawh a tul hle. Tunah phei chuan tourist hmunpui kan ni chho ve mai dawn niin a lang tan a, kan mikhualte lo nuih suk suk ringawt kha a tawk tawh lo, lo biaksawm ve seuh seuh thiam a pawimawh dawn. Mikhual lawm thiam tak ni tura kan infuih hian, tawng thiam lo tan chuan mikhual welcome a harsa a nia. Ram dang angin infrastructure ropui kan nei lo, mahse khualzinte lo dawnsawn thiamna hi kan hralh tur pakhat a ni a, chuta tan chuan tawng thiam hi kan tourism tuthlawh ve tur a ni.