CM duh loh danin ZPM-in ro a rel?

ZPM Executive Committee chuan ZPM Dan bu Article 21-na “Minister leh party elected office bearer nihna chelhkawp theih a ni lo ang” tih chu siam danglamin, chief minister-in (minister dang tel loin) party elected OB a chelh kawp thei ang” tiin tun hnai khan thutlukna a siam fel ta a. Hemi chungchangah hian chief minister Pu Lalduhoma chuan, “Chief minister leh party president nih kawp hi ka mimal chuan tha ka ti lo. Party rorelna sang berin a rel si chuan, kan koa tlu apiang kan pawm erawh a ngai a; party chhung inlungrualna hi kan chakna thahrui a ni,” tiin a sawi ve thung a.
Pu Lalduhoma hian, “chief minister-in party president nihna hi a chelh kawp thiang ve dawn lo” tih hi election campaign lai khan a sawi thin a, chu chu video-ah hmuh tur a awm a. Hetia ZPM rorelna sang berin thutlukna a siam takah chuan, kha a thusawi video clip kha social media lamah a darh chak hle a. Chung zinga video clip tawia a thusawi pakhat chu: “…Keini chief minister chuan portfolio a nei ve dawn lo, Delhi chief minister ang khu kan nei dawn; ani pawhin a nei bik lo…. corruption a awmna chhan chu chief minister hian president nih nen a kawp tlat vang a ni; zilhtu tur an awm lo, hau tur an awm lo, party lamin ‘ê, in kal dan a dik lo’ zuk tih theih pawh a ni lo. Party-ah hotu ber, sawrkarah hotu ber, mi pakhat kutah thuneihna zawng zawng a luh chuan, Pathian biak hian an be lo chauh a ni. ZPM chief minister hian party president nihna hi a chelh kawp thiang ve dawn lo” tih a ni a. Hmun dangah pawh “Collective leadership, thuneihna intawm, lal bik awm lo kan siam dawn…” tih vel hriattur a awm bawk. Heng atangte hian ZPM party hian Pu Lalduhoma duh loh danin ro an rel, tih loh theih a ni lo; amah pawh a tawp thlengin a la tang tang tang tih chu thutlukna siam ni-a a thusawi atang hian a lang a ni.
Party chhungkaw thil a ni a, an duh ang angin an rel thei a, pawn lam mi tan lo inrawlh ve theih pawh a ni lova, sawiselin awmzia a nei teh fahran lovang, kan tih rual in, election campaign lai khan mipui hmaah CM leh President nih kawp chungchang hi uar takin a lo sawi tawh a, mahse a sawi angin tunah hian an party a kal leh ta si lova, ‘party thil a ni’ han tihsak thin mah ila, mipui hnena an intiam anga an awm leh si loh avang hian ‘mipui an bum’ tih theihna a awm ang a; uar deuh duh tan pawh, ‘mipui an bum nasa hle mai’ a tih theih bawk ang.
Tun atang chuan, corruption awm chhan hi chief minister nihna leh party president nihna chelh kawp vang a lo ni chiah lo alawm mawle… kan ti chho leh tan dawn a ang ta viau mai.
ZPM hruaitu lawk mi 12 rualin rawtna an thlen dan hi han bih chiang leh ila: “Kan party constitution-a chief minister leh minister-te elected OB chelh kawp theih loh tih hi, hei chen kan kalpui ta a, kan kalpui tawh dan, party hmakhua leh kal zel tur ngun taka kan thlirin, an nih kawp theih zawk hi party tan a hriselin kan thatpui zawk dawnin kan hria a ni” tih a ni. An kal dan hmasa chu a lo hrisel vak lo tih an hmuchhuak niawm tak a ni.
Eng pawh ni se, neutral vote avanga sawrkar thei nia an insawi thin lai leh, sawrkar term khat em pawh an la hman zawh loh laia mipui hnena an intiamna bawhchhiat a ni ta mai hian, mipui a barakhaih deuh chu niin a lang.