Zan riakin Mizoramah Union MoS

Zan riakin Mizoramah Union MoS
Union minister of state for Youth Affairs and Sports Raksha Nikhil Khadse chuan ni hnih cham turin Thawhlehni khan Aizawl a lo thleng a, Lengpui Airport-ah Sports & Youth Services minister Lalnghinglova Hmar leh protocol officer C Lalremruati ten an lo hmuak.
Mission Vengthlanga SAI Contact Sports Centre tlawh nghalin, MY Bharat Mizoram aiawh, Mizoram Olympics Association leh sports association aiawhte a kawm a ni.
Mizoram Sports minister chuan, state sawrkarin sports tihchangtlun leh hmasawnna atana hma a lak hrang hrang a sawizau a. Mizoram-in national level leh international level-a hlawhtlinna a tawnte sawiin, Hockey Academy for Boys an mamawh thu, Mizoram sawrkarin Vision Olympics 2036 atana hma a lak mek dan leh ruahmanna a siamte a sawi bawk.
Mizoram Olympics Association leh sports discipline hrang hrang – Football, Hockey, Badminton, Archery, Weightlifiting aiawhte pawhin hma an lakna leh an mamawh an lo thlen a. Union minister of state hian theihtawp chhuaha a lo bawhzui tur thu a hrilh.
Contact Sports Centre-a an inkawm zawh veleh Raksha Nikhil Khadse hian Saitual a pan nghal a, nizan khan riakin vawiinah Kolasib a tlawh ang.