“Bana Kaih” chhiarkawp
Bana Kaih thawh thumna “Handholding 3.0” tlangzarhnaah chief minister chuan Bana Kaih Scheme chu Viksit Bharat 2047 tinzawn rana kalpui a nih thu a sawi a. “Mizoram economy hi sang taka chawikan kan tum. Kum rei lo te chhunga eizawnna thar tam tak siam a, state dang ruala kal ve kan duh…” tiin a sawi a.
A thupuiah “Bana kaih chhiarkawp” kan han ti hluai tak na a, information mamawh a kim thei lo a, kan chawk tam thei chuang lo. Chutih rual erawh chuan, tun hnaiah CM special package chungchang kan lo tarlan ve zeuh tawh avang leh, a hnu lawkah Handholding 3.0 tlangzarh a nih leh tak si avangin, CM special package chungchang erawh tuihnih leh lawk a tul.
A tir lamah chuan CM special package kha mi pakhat tan cheng nuai khat tih a ni a, cheng nuai khat pek zat kha mi 479 tiin kan tarlang a (Assembly chhunga CM chhanna report – EastMojo (Feb 25, 2026). Kan hriat angin, cheng nuai khat tih kha a hnuah titlem lehin cheng sing nga tih a ni leh a. Tun hnaia Handholding 3.0 tlangzarhnaah, “A thawh khatnaah CM Special Package hmangin chhungkaw 2,255 te thawhpui an ni a, Rs. 18,33,58,370 sen ral a ni” tih a lo lang ta a; mahse, nuai khat dawng zat leh sing nga dawng zat thliar hran a ni lo. He laia chhiarkawp kan chawh theih chin ni ta chu: cheng nuai khat dawng chin mi 479 = 4,97,00,000; a bak zawng hi cheng sing nga dawng ni ta se, 2255-479=2208X50000=11,04,00,000. Tichuan pawisa sen ral zat tur chu 4,97,00,000 + 11,04,00,000 = 15,83,00,000 a lo ni ang. Mahse, report-ah chuan senral zat hi Rs 18,33,58,370 tih a ni a, kan chhiarkawp nen a inthlauhna hi Rs 2,50,58,370 a lo ni ta a. Hetah hian cheng nuai khat dawng chin leh cheng sing nga dawng chin lo inpawlh ta pawh ni se, engti zawng pawhin fraction hi a awm dawn ta a, chu chu a dik thei ta lo a ni.
Hei bakah hian a thawh hnihnaah CM Special package dawngtu zat hi chhungkaw 3113 an ni a, Rs. 15,17,45,500 sen ral a ni, tih a ni leh a. A thawh hnihnaah hi chuan mi pakhat dawn zat hi cheng sing nga vek a nih tawh a rinawm a, senral zat hi a dawngtu zatin han sem ila, mi pakhat dawn zat tur chu Rs 48,745.74 a ni a, fraction a awm leh bawk.
Eng pawh ni se, Bana Kaih policy hrim hrim hi chu dik taka kalpui a nih chuan thil tha tak a ni. Chief minister-in Bana Kaih Scheme hi Viksit Bharat 2047 tinzawn rana kalpui a nih thu a sawi a. Viksit Bharat 2047 goal chu kan hriat angin – kum 2047-ah chuan India hian developed dinhmun a luah hman tur a ni tih a ni a. Developed country dinhmuna ding tur chuan criteria zingah ei leh bara intodelh tih te hi a pawimawh nasa mai si a, Bana Kaih Scheme ringawt hi chuan Viksit Bharat 2047 hi min thlen zawhpui ngut ange maw le!
CM Special Package chungchangah hian Handholding 3.0 tlangzarh ni khan Handholding CEO chuan, mi thenkhatin ‘sem’ tiin an sawihnawm deuh tiin a sawi a. “Project behchhana pek an ni a, grant a nih avangin rulh a ngai lo” tiin a sawi bawk a.
CM Special Package hi Grant zawk a lo ni a; rulh a ngai lo; an sem lo va, an pe zawk a lo ni tih hi mipuiin kan hriatpui a tha awm e!