MNF-in Martar Day hmang

MNF-in Martar Day hmang
Mizo National Front chuan Thawhtanni khan Mizoram hmun hrang hrangah ‘Martar-te Ni’ vawi 46-na an hmang.
Aizawla hmannaah MNF president Zoramthanga chuan, thangtharten ram tana zalenna sualtu Mizo hnam sipai leh hnam martar-te ngaihsan nachang leh hlut nachang an hre zuiin an ngaihven thar nasa niin a sawi a. Hnam sipai leh hnam tana martar-te inpekna leh hnathawh, engkim huama an inhlanralna kha a ropuiin a zahawm em em a. Vawiina la damte leh thangthar lokal zel turten zah tak chunga kan hriatreng a, thudik hre tura zirchian a pawimawh hle tih a sawi.
“Zalenna sualtu Mizo hnam sipaite leh Mizo hnam martar-te thisen zara kan ramin thil tam tak a lo hlawhchhuah tawhte hi a hlu em em a. Inremna a awm theihna tura kohhran, political party, NGOs, ram mipui ngenna avanga inremna lo awm ta leh an lo hlawhchhuah kha a hlu em em a. Heng zawng zawng hi kan thinlungin engtikah mah a theihnghilh ngai loa, kan ram tana nunna hlantu hnam martar-te thisen hi Mizoram tan a luang thlawn ngai dawn lo,” a ti.
Sawrkar lai mek chief minister leh an political opponent thenkhatin MNF movement leh Mizoram Peace Accord (Memorandum of Settlement) sawinep leh sawihnawm tum thin mah se, Mizo hnam sipaiten ram leh hnam tan nunna thapa zalenna an sualna, hnam martarte thisen man hlutna a dal phah ngai dawn loa, sawinep theih ngawt a ni lo tih Zoramthanga hian a sawi a. Inremnaa tel ve lo, a engamah hre tak taklote lo sawinep ve ngawt chi pawh a ni lo tih a sawi.
“Harsatna tam tak paltlanga Peace Accord-in a hlawhchhuah Article 371(G), kan ILP insawhnghehna tiderthawng thei zawnga ZPM sawrkar chet duh dan hi a demawm hle a. Kan thuneihna hmanga ram kan humhimna tur FCAA an lo dahkham hi Pathian leh mipui zarah MNF a sawrkar leh hunah kan lalet anga, kan ram leh hnam, kan mipui tan kan sawhnghet leh ngei theihnan kum 2028-ah MNF hian Mizoram enkawl tura sawrkarna a chan leh ngei a tul a ni,” a ti.
Hmun hrang hranga Martar Day hmannaah hian martar-te thlanmualah zahna pangpar dah a ni a. Martar-te sunna hun hman theuh a ni bawk.
Martar-te Ni hi September 20 a ni a, kuminah Pathiannia a tlak avangin a tuk, September 21 – Thawhtanni ah hman a ni.