NITI Aayog-in workshop buatsaih Kan economy ruhrel thlak a ngai – Chief minister
NITI Aayog-in workshop buatsaih
Kan economy ruhrel thlak a ngai
– Chief minister
NITI Aayog buatsaihin Thawhtanni khan Aizawlah hmarchhak bial tan workshop, “Strengthening SITs to drive Viksit North Eastern Region” neih a ni a. A hawnnaah hian chief minister Lalduhoma, Home minister K Sapdanga bakah minister leh MLA- te an tel.
Chief minister chuan, NITI Aayog-in State Support Mission hmanga Mizorama hma a lakpui chu an tangkaipui hle a, Mizoram State Institution for Transformation (SIT) a tichak a, plan an siam leh a taka an kalpuina kawngah sawrkar laipui hmathlir milin hma an lak theih phah tih a sawi.
NITI Aayog Governing Council hnuhnung berah Mizorama State Support Mission (SSM) kalpui zel turin a dil a, Mizoram State Assembly-ah ngei pawh SSM an mamawh zia a lo sawi tawh a. A dilna ngaipawimawhin NITI Aayog chuan kum 5 dang atan SSM hi a pawhsei sak leh a, an lawm hle tih a sawi a ni.
Kum 2047-a India GDP-a 1% thawhchhuah ve theih tumin Mizoram hmathlir document – Raltiang Ram an siam tih chief minister hian sawiin, “Kan tum ram hi a sang hle. Tum ram (target) neih ringawt a tawk loa, a taka tihlawhtling tura ke pen a ngai a. He kan tum ram thleng tur hian kan economy ruhrel thlak a ngai tih pawh kan hria. Kan tum ram min hruai thleng ngei tur ruahmanna chu SIT hmangin kan siam a. Chumi hre rana ke kan pen tlan theihnan minister zawng zawng tana intuaitharna buatsaih kan tum a ni,” a ti.
Hmarchhak state-ten Viksit Bharat hmathlir tihhlawhtling turin mahniin engkim an ti vek thei loa, an zaa tanhoa, thawhho a ngai tih a sawi a. Mizoram phei chu international ramri pahnih karcheha awm a ni a. Workshop hian hmarchhak bial anga an thawhhona tur tam tak a khawhhmuh dawn a, an kal dan tur pawh an ngaihtuahho thei dawn tih a sawi a ni.
A hawnnaah hian NITI Aayog member Dr Joram Aniya pawhin thu a sawi a. Hem hnu hian NITI Aayog senior specialist Dr Shashank Shah chuan, state hmathlir siam dan tur, “Formulating State Vision – Roadmap 2047” tih thupui hmangin a sawizau a; consultant Sambuddha Goswami chuan district domestic product estimate dan leh primary sector GDP estimate dan a sawi. Chawhnu lamah SSM hmanga SIT tihchak dan zirhoa sawiho zui a ni. Workshop- ah hian hmarchhak state zawng zawng State Institution for Transformation an tel.