United an chak zo lo leh tawh

English club zingah tantu nei nghah leh thawm na tak Manchester United chu season tharah an che fuh tak tak thei lova, Pathianni zan khan table mawngphaha awm Fulham lakah tlawm an pumpelh thei hram chauh. Result tha an hlawhchhuah theih loh vangin United hian an manager Michael Carrick an iai tan a, Chelsea manager hlui Antonio Conte an hmutai tan viau niin tarlan a ni. United an chak zawh loh lai hian Liverpool in Mimualah hnehna an lo chang ve thung.
Beisei anga season thara bul tan tha lo Manchester United hi table mawngphaha awm mek Fulham hmachhawn turin Craven Cottage ah an lenglut. Mikhual an nihna hmunah chak tum viau mah se beisei an phak lo zui leh a, vanneihthlak takin tlawm an pumpelh thei hram chauh a, point khat hmu rau rauah lawm zawk an ni.
Fulham leh United te hi an inchai tawk viau a, goal thun theihna hun tha an neih an chhawr tangkai zo lo ve ve a, goal an thun thei lawk lo. Inkhel hmuhnawm pangngai takah goal lut a awm theih loh reng hnuin mualneitu an vannei a, own-goal hmangin hmahruaina goal an thun. United si nghak Senne Lammens chuan save tha tak nei bawk mahse ball per let leh chu defender Lisandro Martinez chuan an lamah a dang goal palh a, minute 63-naah Fulham hmahruaina goal a thunsak.
Goal an chhuah hnuin United in an si phurh sut ngei tumin tan an khawh a, goal thun theihna hun tha pawh an nei. Barcelona atanga let leh Marcus Rashford chuan ho lam takin a hun tha neih a hlah leh thin a, beisei a phak loh em vangin thlak a ni zui nghe nghe. Fulham si nghak Berd Leno a chet ropui theih em vangin Fulham an him hram hram zel a, manager thar Alvaro Arbeloa hnuaiah a vawi khat nan an chak teuh hle.
Si an phurh reng hnuin United an vannei ta nge nge a, hun tawp dawn hnaih minute 89-naah Matheus Cunha pet kawh tak chu defender David Affengruber chuan an lamah a dang pial lut. Ball kalna lama bawk tawh si nghal Berd Leno tan Affengrubertan per hi dan hman rual ani tawh lova, minute 89-naah United in an si phurh an sut.
Cunha goal thun hnuin goal dang a luh belh theih tawh lova, Fulham leh an mikhual Manchester United chu 1-1 in an inhnehtawk. United lakah tlawm an pumpelh vangin Fulham hian khelh 5 atangin point 2 an hmu a, table hnuai ber chhuahsanin 19-naah an inhlangkai. Manager thar a nih hnua United chetthatpui thei ta tlat lo Michael Carrick a enkawl United hian khelh 5 atanga point hmuin 12-na an luah ve thung.
United hi an elpui lian Manchester City aiin point 10 zetin an hniam tawh zawk a, hei hi an tan chuan thil tha lo leh duhawm lo tak a ni. EPL ah bul an tan tha lova, Carabao Cup ah Brighton ngam lova an tlak tawh bawk si vangin Michael Carrick duhkhawp lohna leh rinhlelhna thawm a ring sawt hle a ni.
Reds an chak
Pathianni zanah Red Devils (United) an chak zawh loh laiin Reds (Liverpool) erawh mikhual an nihna hmunah Alexander Isak goal thun hmangin an chak a, point thum an hmu ve thung.
Liverpool hian Mimualah AFC Bournemouth an hmachhawn a, minute 57-naa Alexander Isak goal thun hmangin hnehna pawimawh tak an chang. Bournemouth lakah an chak Reds hian hma lam an pan a, khelh 5 atanga point 9 hmuin pa 6-na an luah. Bournemouth hian khelh 5 atangin point 3 chauh an la hmu ve thung a, an la hniam rih hle.