Natural farming kalpuina atan Agri leh MULCO thawhdun tum

Natural farming kalpui turin ran vulhtute nen lei tha siam kawngah thawhdun a ngai a, hemi atan hian Agriculture & Farmers’ Welfare department leh Mizoram Milk Producers’ Cooperative Union Limited (MULCO Ltd.) chuan thawhdunnu thu an thlung.Nilainia MoU ziah hriatpuitu Agriculture & FW minister PC Vanlalruata chuan, Mizorama kuthnathawktu, a bikin ran vulha eizawngte tana hmasawnna tur rahbi thar an kai leh ta tih a sawi a. Ran, a bikin bawng vulhtute tana hmasawnna thlentu a nih ngei a beisei tih sawiin, sawrkar chuan kuthnathawktute dinhmun chawikang turin theihtawp a chhuah zel dawn tih a sawi.
He thawhdunna hnuaiah hian ran zun leh ek atanga leitha leh rannung thahna hlo siam chhuah a nih a, chu’ng chu loneituten an hman tangkai hunah chuan mipui vantlang hriselna pawhin hma a sawn ngei dawn tih a sawi a. Thawhdunna hlawhtlinna tak tak chu department hrang hrang leh helama mawhphurhna neite bakah kuthnathawktute tanrualnaah thui tak a innghat dawn tih a sawi a ni.
MoU ziah hi National Mission on Natural Farming guidelines anga kalpui tur a ni a. Guidelines ang chuan, Bio-input Resource Centre (BRC) ten bawng ek leh bawng zun hmanga siam leitha (organic fertilizers) leh rannung thahna (bio-pesticides) an siam anga, loneitute hnenah an hralh thin ang. Heng inputs hi natural farming hnuaia loneitu inziaklut chuan hmang ngei tura beisei an ni. BRC-ten hnianghnar taka bio-input hrang hrang an siam chhuah reng theihnan leh MULCO hnuaia bawng vulhtuten sum an lakluh belh theihnan MULCO Ltd. huangchhunga bawng vulhtute hian bawng zun hi BRC hnenah an hralh thin dawn a ni.
Agriculture & Farmers’ Welfare department hian, National Mission on Natural Farming Scheme hmang hian kum 2025 atang khan hma a la tan a. Tunah hian district tinah he Mission hi kalpuiin, cluster 304 din a ni tawh a, heng cluster- enkawl tur hian community resource person 608 ruat an ni tawh a, BRC pawh 72 din a ni tawh.